शिक्षा विधेयक मन्त्रिपरिषदले पास गर्दा एउटा थियो, फर्किएर आउँदा उल्टिएर अर्कै भएछः प्रधानमन्त्री प्रचण्ड

२५ साउन, काठमाडौं । प्रधानमन्त्री पुष्पकमल दाहाल प्रचण्डले शिक्षा विधेयकका ऐनहरूमा एक्कासि परिवर्तन भएको भन्दै आश्चर्य प्रकट गरेका छन् । उनले मन्त्रिपरिषदबाट पास भएको संघीय शिक्षा विधेयकका कैयौं विषय उल्टिएर आएको बताएका छन् । मन्त्रिपरिषदमा पास हुँदा एउटा हुने र पछि फर्किएर आउँदा अर्कै हुने रोग देखेर अचम्ममा परेको उनको भनाइ छ । 

बिहीबार मन्त्रीहरूसँग कार्यसम्पादन सम्झौता गर्ने कार्यक्रमलाई सम्बोधन गर्दै प्रधानमन्त्री प्रचण्डले नीति कार्यक्रम र बजेटकै ओरिजिनल भर्सन हेरफेर भएको बताए । मन्त्रिपरिषदले गरेका निर्णय कार्यान्वयनमा जानुको सट्टा त्यसको विषय वस्तु नै अन्तर भएर आउनु दुःखद भएको बताए । 

उनले शिक्षा विधेयक उल्टिएर आएको बताउँदै भने, ‘अहिले एउटा नमिठो अनुभव भयो । संघीय शिक्षा ऐन सुरुमा जस्तो थियो, फर्किएर आउँदा कैयौं विषय त विल्कुल उल्टो, झन् नेगेटिभ भएर आएको देखियो । यो कसले र किन गर्यो । यसलाई कडाइका रुपामा नलिने हो भने यस्ता प्रवृत्तिले सधैं सताउने बताए । 

त्यही कारण संघीय शिक्षा ऐनलाई संसदमा दर्ता गर्न नसकेको उनले बताए । प्रधानमन्त्री प्रचण्डले आफू त्यसको खोजीमा रहेको भन्दै  कसले यस्तो गर्यो ? कहाँबाट कुन ठाउँबाट यस्तो भयो हो भन्ने खोजिहुने बताए । मन्त्रिपरिषदका सदस्यहरूले राम्रोसँग हेर्न नपाउँदै विधेयकका व्यवस्थाहरु सार्वजनिक भएको र यो गलत वा सही भन्ने स्थिति बनेको उनले बताए ।

वन ऐन संशोधनका क्रममा पनि झन् नेगेटिभ भएर आएको मन्त्रीको गुनासो रहेको प्रधानमन्त्रीले सुनाए । क्याबिनेटले गरेको निर्णय समेत लागू नभएको अनौठो स्थिति देखा परेको भन्दै उनले भने, ‘कित्ताकाट सम्बन्धी धेरै निर्णय गरियो, कार्यान्वयनमा समस्या छ । कहाँ गएर अड्किएको छ ? अरु कतिपय विषयमा पनि मन्त्रिपरिषदले गरेको निर्णय सचिवले म कार्यान्वयन गर्न सक्दिनौ भनेको पनि उनले सुनाए । प्रधानमन्त्री प्रचण्डले अगाडि भने, ‘अब यस्तो चल्दैन । ठाउँको ठाउँ कारबाही गर्नुको विकल्प छैन ।’