सांसद सुनिल शर्मासहित सीआईबीको अपरेशनमा पक्राउ परेका डाक्टरलाई लाजिम्पाटस्थित नयाँ भवनमा राखियो

२५ साउन, काठमाडौं । नक्कली शैक्षिक प्रमाणपत्र प्रयोगको आरोपमा पक्राउ पर्ने चिकित्सकको संख्या पाँच पुगेको छ । सीआईबीले डा. रामबाबु यादव, डा. एरिना यादवलाई नियन्त्रणमा लिएसँगै पक्राउ पर्ने डाक्टरको संख्या पाँच पुगेको हो । यसअघि आजै कांग्रेसका सांसद डा. सुनील शर्मासहित डा. रञ्जितकुमार यावद र डा. अमृत चौधरलाई सीआईबीले पक्राउ गरेको थियो ।

प्रहरीको केन्द्रीय अनुसन्धान ब्यूरो (सीआईबी) ले चलाएको अपरेसन ‘फोक्सट्रोट चार्ली’ मा सांसद् सुनिल शर्मासहित पाँच जना पक्राउ परेको सीआईबीकीले जनाएको छ । पक्राउ पर्ने पिपरा–८, महोत्तरीका डा. रञ्जितकुमार यादव, त्रिवि शिक्षण अस्पताल मा कार्यरत डा. अमित चौधरी, रौतहटका डा. रामबाबु यादव र डा. एरिना शाह छन् । शाहलाई सीआईबीले काठमाडौंबाट पक्राउ गरेको हो भने यादवलाई रौतहटबाट पक्राउ गरिएको हो ।

सीआईबीले नक्कली शैक्षिक प्रमाण पत्र भएका चिकित्सकहरुविरुद्ध बिहीबार दिउँसो उपत्यकासहित विभिन्न जिल्लामा एकसाथ अपरेशन चलाएको थियो । त्यहीक्रममा पाँच जना पक्राउ परेका हुन् । पक्राउ परेकाहरुलाई ब्यूरोले लाजिम्पाटस्थित नयाँ कार्यालयमा राखेको छ । अपराह्न शर्मालाई गोल्फुटारस्थित घरबाट पक्राउ गरेको थियो । उनले आईएस्सीको शैक्षिक प्रमाण पत्र नक्कली लिएर थप अध्ययन गरेको सीआईबीले जनाएको छ । बिहीबारै सीआईबीले उनी पक्राउ परेको बारे संसद् सचिवालयलाई जानकारी गराइसकेको छ ।