हिन्दु परिषदका महासचिव र भारतीय विदेश मन्त्रालयका कर्मचारी सुटुक्क नेपालमा

२५ साउन, काठमाडौं । माओवादी नेताहरू भारतको भ्रमणबाट फर्के लगत्तै नेपालमा भारतीय विदेश मन्त्रालयका दुई जना अधिकारी र हिन्दु परिषदका एक नेता काठमाडौं आइपुगेका छन् । फरक फरक दिनमा उनीहरू नेपाल आएका हुन् । उच्च सुरक्षा स्रोतले दिएको जानकारी अनुसार विदेश मन्त्रालयका अधिकारी मंगलबार साँझ नेपाल वायुसेवा निगमको उडान नम्बर आरए २१७ मा बाट काठमाडौं आएका हुन ।

स्रोतका अनुसार विदेश मन्त्रालयका निर्देशक मदनलाल राइगर र अधिकृत अश्विन भाष्करण नेपाल आएका हुन् । बुधबार बिहान विश्व हिन्दू परिषदका अन्तर्राष्ट्रिय महासचिव मिलिन्द पराण्डे एअर इण्डियाको उडान नम्बर एआई २१३ बाट नेपाल आएका छन् । यो विषयमा भारतीय राजदूत र नेपाली अधिकारीहरूले आधिकारिक धारणा सार्वजनिक गरेका छैनन् ।

राष्ट्रिय अनुसन्धान विभागका एक अधिकारीका अनुसार उनीहरू नेपाल कुन कार्यक्रमको लागि आएका हुन भन्ने जानकारी छैन । तर पनि विभागका अधिकारीहरूले उनीहरूको निगरानी भने गरिरहेका छन् । नेपाल राजनीतिक अवस्था निकै तरल भइरहेको बेला विदेश मन्त्रालयका कर्मचारी नेपाल आएका हुन् । यता भारतीय दूतावासका सञ्चार हेर्नै जिम्मा पाएका कर्मचारी साहिल भने नेपालको रिपोर्ट बोकेर दिल्लीको गृहमन्त्रालय पुगेका छन् । 

प्रधानमन्त्री पुष्पकमल दाहाल भारत भ्रमणबाट फर्केर आएपछि नेपालमा हिन्दु परिषदका नेता आउनुलाई एक प्रकारले अर्थपूर्ण मानिएको छ । उनको पनि नेपालमा कुनै कार्यक्रम रहेको छैन । गत असोजमा पनि भारतीय विदेश मन्त्रालयका नेपाल मामिला हेर्ने एक उच्च अधिकारी नेपाल आएका थिए । त्यति बेला विदेश मन्त्रालयका नेपाल र भुटान मामिला हेर्ने सहसचिव अनुराग श्रीवास्तव काठमाडौं थिए । नेपाल र भारतका संयुक्त परियोजनाका बैठकमा सहभागी हुन काठमाडौं आएको बताइएपनि अहिलेसम्म उनले सो बैठकमा सहभागी नभई दिल्ली पुगेका थिए । त्यति बेला उनी दिल्ली जानु र नेपाली सञ्चारकर्मीहरूको टोली पनि दिल्ली पुगेका बेला नेपाल पुग्नुको कारणबारे नेपालमा हुन लागेको आम निर्वाचनको विशेष जानकारी राख्नु बताएका थिए । 

त्यति बेला सुरक्षा अधिकारीहरूलाई समेत जानकारी नदिइ काठमाडौ आएका श्रीवास्तवलाई भारतीय दूतावासले आफ्नो अतिथि भन्दै दूतावास पुयाएपछि मात्रै विदेश मन्त्रालयका नेपाल मामिला हेर्ने कर्मचारी खुलेको थियो । अहिले आएका कर्मचारीहरू जुनिएर भएपनि उनीहरू नेपाल आउनुको कुनै पनि प्रयोजन नखुलेका यहाँको सत्तामा कुनै न कुनै गडबडी हुँदै छ कि भन्ने अनुमान लगाइएको छ । 

यही बीचमा जनता समाजवादी पार्टीले शुक्रबारलाई केन्द्रीय कार्यसमितिको बैठक बोलाएको छ । प्रचण्डले गौर हत्या काण्डको फाइल अघि बढाउने भनेपछि समाजवादीका अध्यक्षले सो बैठक डाकेका हुन् । भारतीय विदेश मन्त्रालयका कर्मचारी नेपाल आउनु र जसपाको बैठक बस्नुलाई संयोग मात्रै मानिएको भएपनि २०७८ साल पुसमा आएको भारतीय उच्च सुरक्षा टोलीसहित भारतीय विदेश विभागका अधिकारीहरू काठमाडौंको राजनीतिलाई दिल्लीसम्म कनेक्सन गराएका थिए । सुरक्षा निकाय स्रोतका अनुसार भारती सुरक्षा टोली त्यति बेला पनि नेपाली सुरक्षाकर्मीलाई जानकारी नदिई काठमाडौं आएको थियो ।

त्यति बेला भारतीय विदेश मन्त्रालयको बन्दोबस्ती र सुरक्षा हेर्ने टोली काठमाडौं आएको थियो । त्यति बेला भारतको विदेश मामिला मन्त्रालयको बन्दोबस्ती तथा सम्पत्ति खरिद विभागका सहसचिव आलोक रञ्जन झाको नेतृत्वमा वरिष्ठ आर्किटेक्ट निधि आनन्द र कर्णेल विनय बहलको टोली काठमाडौं थियो । त्यति बेला टोली वीरगञ्जस्थित महावाणिज्य दूतावासका लागि जग्गा खरिद र भवन निर्माणको पूर्व तयारीका लागि आएको दाबी गरिएको भएपनि शेरबहादुर देउवा नेतृत्वको सरकार निर्माणमा सहयोग पुर्याएको थियो ।