प्रभु बैंकको खराब कर्जाले किस्ट र ग्राण्ड बैंकको याद दिँदै, वित्तीय अवस्था झनै कमजोर

२६ साउन, काठमाडौं । कुनै समय किस्ट र ग्राण्ड बैंकसँग मर्जर सकाएर खराब कर्जालाई कम गराउँदै लाभांश पनि वितरण गर्न सुरु गरेको प्रभु बैंकको अहिलेको खराब कर्जा हेर्दा उही पुरानो बैंकको रुपमा देखिन थालेको छ ।

अघिल्लो आर्थिक वर्षको अन्त्यमा १ दशमलव ८६ प्रतिशत रहेको खराब कर्जा गत आर्थिक वर्षको चौथो त्रैमासमा ४ दशमलव १६ प्रतिशत पुगेको छ । वितरणयोग्य मुनाफा पनि १६ करोड मात्र छ । २३ अर्ब माथि चुक्ता पुँजी भएको कम्पनीको यति थोरै वितरणयोग्य मुनाफा हुँदा प्रतिशेयर वितरणयोग्य मुनाफा एक प्रतिशत पनि छैन । 

यस बैंकको संचालक समितिको अध्यक्षमा लिलाप्रकाश सिटौला रहेका छन् । उनी नेपाल राष्ट्र बैंकका पूर्व कार्यकारी निर्देशक हुन । यस अघि कृषि विकास बैंकको प्रमुख कार्यकारी अधिकृत रहेका सिटौला प्रभु बैंकका डमी अध्यक्ष मात्र हुन । यस्तै बैंकको संचालक समितिका अन्य सदस्यमा रमेशसिंह खड्का, शंकरप्रसाद कालिकोटा, रामेश्वर सापकोटा, अविशेक बज्राचार्य र गीता प्रधान रहेका छन् । सञ्चालकहरु पनि प्राय पूर्व अध्यक्ष देवी प्रसाद भट्टचनका डमी सदस्यहरु नै हुन ।

त्यस्तै बैंकको उच्च व्यवस्थापनमा फाइनान्स हुँदा देखिका सीईओ अशोक शेरचनदेखि वरिष्ठ डेपुटी सीईओमा मनोज न्यौपाने र डेपुटी सीईओमा मणिराम पोखरेल रहेका छन् । सीईओ शेरचनको नेतृत्वमा बैंक दिन प्रतिदिन ओरालो यात्रामा देखिएको छ । उनको तेस्रो कार्यकाल विवाद उच्च अदालत पाटनमा विचाराधीन छ । 

कस्तो आयो आर्थिक वर्ष ०७९-८० को चौथो त्रैमासको वित्तीय प्रतिवेदनः
खुद मुनाफाः
गत आर्थिक वर्षको चौथो त्रैमास अर्थात् १२ महिनाको अवधिमा बैंकले २ अर्ब ८२ करोड बराबर खुद मुनाफा गरेकोमा अघिल्लो आर्थिक वर्षको चौथो त्रैमाससम्ममा बैंकले १ अर्ब ९० करोड बराबर खुद मुनाफा गरेको थियो । यसरी खुद मुनाफामा ४८ दशमलव ५४ प्रतिशतको वृद्धि भएको छ ।

खुद ब्याज आम्दानी र संचालन मुनाफाः
अघिल्लो आर्थिक वर्षको चौथो त्रैमासमा कम्पनीले ५ अर्ब ७४ करोड बराबर खुद ब्याज आम्दानी गरेकोमा गत आर्थिक वर्षको चौथो त्रैमाससम्म कम्पनीले १० अर्ब २५ करोड खुद ब्याज आम्दानी गरेको छ । यसरी खुद ब्याज आम्दानीमा ७८ दशमलव ६२ प्रतिशतको वृद्धि भएको छ । त्यस्तै, संचालन मुनाफा ४७ दशमलव ५२ प्रतिशतले वृद्धि हुँदै ४ अर्ब २० करोड पुगेको छ । अघिल्लो वर्षको चौथो त्रैमासमा कम्पनीले २ अर्ब ८५ करोड संचालन मुनाफा गरेको थियो ।

प्रतिशेयर आम्दानी:
कम्पनीको वार्षिक प्रतिशेयर आम्दानी १२ रूपैयाँ मात्र हुन आउँछ । एक वर्ष अघि प्रतिशेयर आम्दानी १४ रुपैयाँ ९७ पैसा थियो । समिक्षा अवधिमा प्रतिशेयर आम्दानी १९ दशमलव ८४ प्रतिशतले घटेको छ ।

वितरणयोग्य मुनाफा:
कम्पनीको वितरणयोग्य मुनाफा १६ करोड १६ लाख रहेको छ । अघिल्लो आर्थिक वर्ष वितरणयोग्य मुनाफा १ अर्ब ३ करोड थियो । समिक्षा अवधिमा वितरणयोग्य मुनाफा ८४ दशमलव ३५ प्रतिशतले घटेको छ । कम्पनीको प्रतिशेयर वितरण योग्य मुनाफा शून्य रुपैयाँ ६९ पैसा रहेको छ । अघिल्लो आर्थिक वर्ष प्रतिशेयर वितरणयोग्य मुनाफा ८ रुपैयाँ १३ पैसा थियो ।

निक्षेप, कर्जाः
कम्पनीले गत आर्थिक वर्षको चौथो त्रैमाससम्म २ खर्ब ८९ अर्ब निक्षेप संकलन गरी २ खर्ब ३८ अर्ब कर्जा प्रवाह गरेको छ । आर्थिक वर्ष २०७८-७९ को असार मसान्त र अहिलेको तथ्यांकलाई दाँजेर हेर्दा कम्पनीको निक्षेप संकलन ६१ दशमलव ८२ प्रतिशतले वृद्धि भएको छ भने कर्जा प्रवाह पनि ६३ दशमलव ८५ प्रतिशतले वृद्धि भएको छ ।

जगेडा कोष, संचित मुनाफाः
जगेडा कोष ८५ दशमलव ३६ प्रतिशतले बढ्दै १० अर्ब २ करोड पुगेको छ भने संचित मुनाफा ८४ दशमलव ३५ प्रतिशतले घटेर १६ करोड १६ लाख रुपैयाँ पुगेको छ ।

किताबी मूल्य कति ?
कम्पनीको किताबी मूल्य (प्रतिशेयर नेट्वर्थ) १४३ रुपैयाँ २५ पैसा आउँछ ।

निष्क्रिय कर्जाः
कम्पनीको खराब कर्जा ४ दशमलव १६ प्रतिशत रहेको छ । अघिल्लो आर्थिक वर्षको चौथो त्रैमासमा खराब कर्जा १ दशमलव ८६ प्रतिशत थियो ।

आधार ब्याजदर, स्प्रेडदरः
बैंकको आधार ब्याजदर केही बढ्दै १० दशमलव १६ प्रतिशत पुगेको छ । यस बैंकबाट कर्जा लिन व्यवसायीहरूलाई ब्याजदर महंगो पर्न आउँछ । यस्तै स्प्रेडदर ४ दशमलव ८६ प्रतिशत छ । अघिल्लो आर्थिक वर्ष सोही अवधिमा स्प्रेडदर ४ दशमलव ३२ प्रतिशत थियो ।