संसद अवरोध र संसदीय समितिमा सभापति पठाउने बारे छलफल गर्न कांग्रेस संसदीय दलको बैठक बस्दै

२६ साउन, काठमाडौं । लामो समयदेखि प्रमुख प्रतिपक्षी दल नेकपा एमालेले जारी राखेको संसद अवरुद्ध र कांग्रेसको भागमा परेका संसदीय समितिको सभापतिमा कसलाई पठाउने भन्ने बारे छलफल नेपाली कांग्रेसले संसदीय दलको बैठक बोलाएको छ । बैठक शुक्रबार दिउँसो १ बजे नयाँ बानेश्वरस्थित लोत्से हलमा बस्ने छ ।

बैठकमा अवरुद्ध सदन खुलाउने, सदनमा विचाराधीन रहेका विधेयकलाई कसरी अगाडि बढाउने ? नयाँ विधेयक कसरी प्रस्तुत गर्ने भन्ने बारे छलफल हुने संसदीय दलका प्रमुख सचेतक रमेश लेखकले जानकारी दिए । यस्तै कांग्रेसले पठाउनुपर्ने संसदीय समितिका सभापतिको नाम पनि आजै टूंगो लगाउने तयारीमा कांग्रेस रहेको उनले बताए ।  

बैठकमा आगामी दिनमा संसदमा कांग्रेस कसरी प्रस्तुत हुने, डेंगु रोगको रोकथाम, पशुपंक्षीमा लाग्ने लम्की रोगको उपचार, मानिसमा आँखा पाक्ने रोगको उपचारबारेमा सरकारको ध्यानाकर्षण गराइने बारे छलफल हुनेछ । 

संसदीय समितिमा सत्तारुढ दल नेपाली कांग्रेसले ४, माओवादी केन्द्रले २, एकीकृत समाजवादी, जसपा र जनमतले १–१ तथा प्रमुख प्रतिपक्षी दल नेकपा एमालेले ३ वटा संसदीय समितिको नेतृत्व गर्ने सहमति भएको छ । भागबण्डा अनुसार कांग्रेसले अर्थ समिति, संसदीय सुनुवाई समिति, राज्य व्यवस्था तथा सुशासन समिति र कृषि तथा प्राकृतिक स्रोत समितिको नेतृत्व पाएको छ ।