संसदको जारी अवरोध र राजनीतिक घटनाक्रम बारे राष्ट्रपतिद्वारा सभामुख र राष्ट्रियसभा अध्यक्षसँग छलफल

२६ साउन, काठमाडौं । राष्ट्रपति रामचन्द्र पौडेलले प्रमुख प्रतिपक्षी दल नेकपा एमालेले लगातार गरिरहेको संसद अवरोध र समसामयिक पछिल्ला राजनीतिक घटनाक्रमबारे प्रतिनिधिसभाका सभामुख देवराज घिमिरे र राष्ट्रियसभा अध्यक्ष गणेशप्रसाद तिमिल्सिनासँग छलफल गरेका छन् । 

शुक्रबार बिहान १० बजे राष्ट्रपति कार्यालय शीतल निवासमा भएको भेटमा संसदको जारी अवरोधबारे छलफल भएको सभामुखका प्रेस सल्लाहकार शेखर अधिकारीले जनाएका छन् । सो क्रममा राष्ट्रपतिले संसदको जारी अवरोधबारे चासो राखेका थिए । सो भेटमा राष्ट्रपति पौडेलले सदन अवरोध खुवाउन राष्ट्रियसभा अध्यक्ष र सभामुख घिमिरेले पहल र छलफल गर्नुपर्ने बताएका थिए । 

भेटमा सभामुख र राष्ट्रिय सभा अध्यक्षले सदनको अवरोध खुलाउन राष्ट्रपतिबाट समेत सहयोगको अपेक्षा राखेको बताएका  थिए । गत साउन १० गतेदेखि प्रतिनिधि सभा बैठकमा एमालेले सुन तस्करीको विषयमा उच्चस्तरीय छानबिन आयोग बनाउन माग राखेर अवरोध गर्दै आइरहेको छ ।