प्रतिनिधिसभा बैठकमा प्रतिपक्षको अवरोध र सत्ता पक्षको विरोध, बैठक अवरूद्ध

२६ साउन, काठमाडौं । शु्क्रबार बसेको प्रतिनिधिसभाको बैठकमा प्रमुख प्रतिपक्षी एमालेका सांसदहरुले विरोध जनाएका छन् । बैठक जारी छ । तर सत्ता पक्षका सांसदहरुले प्रतिपक्षीले पुर्याइरहेको अवरोधको विरोध गरेका छन् । 

दुवै पक्षका सांसदहरु उठेर विरोध गरिरहेका छन् । बैठकमा एमालेका तर्फबाट सांसद ज्वालाकुमारी साहले क्वीन्टल सुन प्रकरणमा उच्च स्तरीय छानबिन समिति गठन बनाउन माग गरिन् । प्रकरणमा अर्थमन्त्री र गृहमन्त्रीमाथि छानबिन हुनुपर्ने माग गरेकै आधारमा कांग्रेसका सांसद सुनिल शर्मालाई पक्राउ गरिएको भन्दै आपत्ति जनाइन् । 

अहिले एमालेका सांसदहरु वेल घेराउमा उत्रिएका छन् । समिति गठन नभएसम्म बैठक चल्न नदिने भन्दै सरकारविरुद्ध नाराबाजी गरिरहेका छन् ।

सभामुख देवराज घिमिरेले सांसदहरुलाई बस्न आग्रह गरिरहेका छन् ।