नेपाल प्रहरीद्वारा करिव ५३ लाख नेपाली नक्कली नोटसहित राजधानीका विभिन्न ठाउँबाट ९ जना पक्राउ

२६ साउन, काठमाडौं । नेपाल प्रहरीले विभिन्न ठाउँबाट करिब ५३ लाखभन्दा बढी नेपाली नक्कली नोटसहित ९ जनालाई पक्राउ गरेको छ । प्रहरीले शुक्रबार पत्रकार सम्मेलन गरेर नक्कली नोट कारोबारीलाई सार्वजनिक गरेको हो । थानकाेट वृतकाे प्रहरीले काठमाडौंको नागढुंगा, नयाँ बसपार्क र भक्तपुरबाट ५२ लाख ७५ हजार नक्कली नोट बरामद गरेको हो ।

प्रहरीले नागढुंगामा चेकजाँच गर्दा लुम्बिनीबाट बिहीबार काठमाडौं आउँदै गरेको लु १ प ५ नम्बरको हरियो नम्बर प्लेट भएको पर्यटक बसबाट ३५ लाख ७३ हजार रूपैयाँ बरामद गरेको हो । चेकजाँचका क्रममा बसको डिक्कीमा राखेको चाउचाउको कार्टुनमा एक हजार दरका तीन हजार ५७३ थान नक्कली नोट फेला परेको हो ।   
 
पक्राउ पर्नेमा सिन्धुपाल्चोकका सुशील कार्की, शिव भण्डारी, अर्जुन सुवेदी, मिलन भण्डारी, कृष्ण भण्डारी, झापाका युवराज राई, अछामका अर्जुन बुढा, गुल्मीका सागर आचार्य र पार्वती नेपाली रहेका छन् । उनीहरूको साथबाट ५२ लाख ७५ हजार रूपैयाँ नक्कली नोट बरामद भएको प्रहरीको भनाइ छ ।

प्रहरीका अनुसार सुरुमा बिहीबार राजधानीको थानकोटबाट थानकाेट वृतका प्रहरीले पर्यटक गाडीमा पठाइएको नक्कली ३६ लाख रूपैयाँ बरामद गरेकाे थियो । त्यसपछि खोजतलासका क्रममा थप रकम र कारोबारलाई प्रहरीले नियन्त्रणमा लिएको हो । कारोबारीहरुले भक्तपुरको चाँगुनारायणमा कारखाना नै सञ्चालन गरेर नक्कली नोट उत्पादन गर्ने गरेको अनुसन्धानबाट खुलेको छ ।