विप्लव नेकपाको स्थायी समितिको बैठक शिवगढीमा

२६ साउन, काठमाडौं । नेत्रविक्र चन्द ‘विप्लव’ नेतृत्वको नेपाल कम्युनिस्ट पार्टी (नेकपा)को स्थायी समिति बैठक सुरु भएको छ । कपिलवस्तुको शिवगढीस्थित पार्टी केन्द्रीय कार्यालयमा शुक्रबार बिहान बैठक सुरु भएको हो ।

बैठकमा माओवादी केन्द्र समेतगरी ४ दल मिलेर बनेको समाजवादी मोर्चाको आगामी कार्ययोजनासम्बन्धी विषय, पार्टीको ६ महिने आवधिक कार्ययोजनाको समिक्षा लगायत विषयमा छलफल हुने कार्यालयले जनाएको छ । पार्टीको शीर्ष तहका नेताहरुले हालै मात्र केन्द्रीय प्रतिनिधिलाई प्रशिक्षण दिएका थिए । 

स्थायीको बैठकपछि ब्युरो, केन्द्र र केन्द्रीय प्रतिनिधि समितिको  बैठक बस्दैछ । नेकपाले संसद व्यवस्थाविरुद्ध संघर्ष गर्दै आइरहेको छ । उसले एमसीसी सम्झौताको घोर विरोध गर्दै आइरहेको छ ।

नेकपामा महासचिव विप्लवसहित ७ सदस्यीय स्थायी समिति रहेको छ । खडगबहादुर विश्वकर्मा, सन्तोष बुढा, अनिल शर्मा, भरत बम, उमा भुजेल र कर्णजित बुढा समितिका सदस्य हुन् ।