कोशीमा जसपाकी निर्मला लिम्बू बनिन् स्वास्थ्य मन्त्री

२६ साउन, विराटनगर । कोशी प्रदेश सरकारमा जनता समाजवादी पार्टी (जसपा)की एक्ली सांसद निर्मला लिम्बू स्वास्थ्य मन्त्री बनेकी छन् । 

मुख्यमन्त्री उद्वव थापाको सिफारिसमा प्रदेश प्रमुख पर्शुराम खापुङले शुक्रबार लिम्बूलाई स्वास्थ्य मन्त्रीमा पद तथा गोपनीयताको सपथ खुवाएका छन् ।

कोशीमा माओवादी केन्द्र, एकीकृत समाजवादी, जसपासहितको समर्थनमा कांग्रेसको नेतृत्वमा सरकार छ । यसअघि एमाले नेतृत्वको सरकारमा मन्त्री रहेकी लिम्बू पहिचान पक्षधरको आन्दोलनको दबाबमा राजीनामा दिएर सरकार बाहिर आएकी थिइन् । नयाँ गठबन्धन बनेपछि उनी सरकारमा पुनः मन्त्री बनेकी हुन् । 

मुख्यमन्त्री थापाले आजै मात्र विज्ञप्ति जारी गरेर पहिचान पक्षधरहरुसँग वार्ता गर्ने प्रतिवद्धता जनाएका छन् । कोशी नाम खारेज गरी पहिचानको आधारमा नामाकरण गर्नुपर्ने मागसहित कोशीमा गत फागुनदेखि किरात, राई, लिम्बू लगायत आदिवासी जनजाति समूदाय आन्दोलनमा छन् ।