काममा अति सुस्तता आएपछि मन्त्रीहरुलाई हरेक महिना प्रगति विवरण बुझाउन भनेको हुँः प्रधानमन्त्री प्रचण्ड

२७ साउन, चितवन । प्रधानमन्त्री पुष्पकमल दाहाल प्रचण्डले मन्त्रिपरिषदबाट भएका निर्णयहरु नै कार्यान्वयन हुन नसकेपछि काम चाँडो गराउनका लागि आफूले कार्यसम्पादन सम्झौता गरेको बताएका छन् । हरेक मन्त्रीहरूलाई नमुना कार्य गरेर देखाउनका लागि कार्यसम्पादन सम्झौता गरिएको बताएका छन् ।

चितवनको भरतपुर २२ पटिहानीमा अन्तर्राष्ट्रिय युवा दिवसको अवसरमा आयोजित कार्यक्रमलाई सम्बोधन गर्दै प्रधानमन्त्री प्रचण्डले मन्त्रीहरूले हरेक महिना प्रगति विवरण बुझाउनुपर्ने भएपछि काममा केही सुधार आउने बताए । अहिलेको सरकार सुशासन, न्याय र सम्बृद्धिको लागि दृढ भएर लागेको बताउँदै प्रधानमन्त्री प्रचण्डले नेपालमा सम्बृद्धिको यात्रा अगाडि बढाउँदै सुशासन कायम गरेर भष्ट्राचारको अन्त्य गर्न सरकार लागेको बताए ।

उनले बुढीगण्डकी लगायतका ठूला परियोजनाहरूको निर्माण कार्य अगाडि बढ्न लागेको जनाउँदै एउटै परियोजनाबाट १० हजार मेगावाटसम्म विद्युत निकाल्ने गरी काम भइरहेको बताए । विदेशमा जाने युवा र स्वदेश भित्र नै केही उत्पादन गर्न चाहने युवाहरूका पक्षमा सरकारले महत्वपूर्ण निर्णय गरेको प्रधानमन्त्री प्रचण्डको भनाईं छ ।