नेपाली कांग्रेसले सुन तस्करी प्रकरण र संसद अवरोधबारे आफ्नो धारणा सार्वजनिक गर्दै

२८ साउन, काठमाडौं । नेपाली कांग्रेस संसदीय दलको बैठक आज पनि बस्दै छ । शुक्रबारदेखि सुरू भएको संसदीय दलको बैठक आइतबार फेरि बस्न लागेको हो । दलको बैठकमा बोल्न चाहने सबै सांसदहरुलाई बोल्न दिइएका कारण बैठक लम्बिएको हो ।

बैठक नयाँ बानेश्वरस्थित संघीय संसद भवनको ल्होत्से हलमा मध्यान्ह साढे १२ बजेदेखि सुरू हुनेछ । शुक्रबारको बैठकमा १९ जना सांसदहरूले धारणा राखिसकेका छन् भने पदाधिकारीसहित सभापति शेरबहादुर देउवाले धारणा राखेका छैनन् ।

बैठक विभिन्न सात एजेन्डामा केन्द्रित छ । प्रमुख सचेतक रमेश लेखकका अनुसार आइतबारको छलफलपछि कांग्रेसले संसदको गतिरोध, संसदमा विचाराधीन रहेका विधेयक, संसदीय भूमिकासहितका विषयमा दलको धारणा प्रस्ट हुनेछ । उनका अनुसार आइतबार सांसदहरूले धारणा राखिसकेपछि बैठक सकिनेछ ।