हरेक भन्सारमा छली र ठगी जस्ता काम भइरहेका छन, तपाईहरु एक्सन प्लान बनाएर काम गर्नुसः अर्थमन्त्री

२८ साउन, काठमाडौं । अर्थमन्त्री डा. प्रकाशशरण महतले हरेक भन्सार कार्यालयमा भन्सार छली, चोरी निकासीलगायत कार्य भइरहेको भन्दै मातहतका कर्मचारीलाई यसलाई रोक्ने गरी काम गर्न निर्देशन दिएका छन् । भन्सार कार्यालयहरूबाट हुँदै आएका सबै प्रकारका ठगी रोक्न एक्सन प्लान बनाएर काम गर्न भन्सारका कर्मचारीहरूलाई उनले निर्देशन दिएका हुन् । मन्त्री महतले कुनै पनि भन्सारबाट सामान आयात वा निर्यातका क्रममा थोरै मात्र कमजोरी भेटिए कारबाही गर्ने चेतावनी पनि दिएका छन् । 

भन्सार विभागले आइतबार आयोजना गरेको भन्सार व्यवस्थापन गोष्ठीलाई सम्बोधन गर्दै उनले भन्सारमा धेरै गलत गतिविधिहरू भएकाले अब यसलाई रोक्न कुनैपनि मापदण्ड प्रयोग गर्न आवश्यक भएको बताए । अर्थमन्त्री महतले कार्यालय प्रमुख र अरू कर्मचारीबीच कामको सामन्जस्यता नमिलेको पाइएको भन्दै एक अर्काबीच चेक एण्ड ब्यालेन्स मिलाएर काम गर्न निर्देशन दिए । 

उच्च मनोबलका साथ काम गर्न भन्सारका कर्मचारीहरूलाई निर्देशन दिँदै मन्त्री महतले भन्सार कार्यालयको स्तरवृद्धि र कर्मचारीहरूको क्षमता वृद्धिका लागि सरकारले पूरा सहयोग गर्ने बताए । उनले हरेक कार्यालयलाई एक्सन प्लान बनाएर काम गर्न पनि निर्देशन दिए । साना भन्सार कार्यालयका कर्मचारीहरूलाई आफूलाई सानो नठान्न आग्रह गर्दै हरेक कामलाई गहन जिम्मेवारीमा छु भनेर गर्न र भन्सार छली र अवैधानिक काम नहोस् भन्नेमा सतर्क रहन निर्देशन दिए ।