चिकित्सा शिक्षा ऐन परिमार्जनको माग गर्दै माइतीघरमा प्रदर्शन

२८ साउन, काठमाडौं । चिकित्सा शिक्षा ऐन परिमार्जनको माग गर्दै सरोकार वालाहरुले काठमाडौंको माइतीघरदेखि नयाँ बानेश्वरसम्म प्रदर्शन गरेका छन् । चिकित्सा शिक्षा ऐनका कारण नर्सिङ कलेजहरु बन्द हुने अवस्था आएको भन्दै माइतीघरमा भेला भइ नर्सिङ कलेज सञ्चालकहरु, शिक्षक, कर्मचारी, विद्यार्थी तथा अभिभावकहरुले विरोध प्रर्दशन गरेका हुन् । 

उनीहरुले नर्सिङ कलेज सबै शिक्षण संस्था बन्द गरेर प्रदेशस्तर र  जिल्लास्तरमा विरोध जनाएको बताएका छन् । संघर्ष समितिले बिहीबार १४ बुँदे माग राख्दै तेस्रो चरणको आन्दोलनका कार्यक्रम घोषणा गरेको थियो । पहिलो र दोस्रो चरणका आन्दोलनका कार्यक्रमबाट आफूहरुको माग सम्बोधन नभएको भन्दै तेस्रो चरणमा कलेजहरु बन्द गरेर शान्तीपूर्ण आन्दोलनमा उत्रिनुपरेको उनीहरुले बताएका छन् । 

उनीहरुले सबै विधा समेटी दरबन्दी कायम गरी तत्काल पदपूर्ति गर्न, स्वास्थ्यकर्मी तथा संस्थाहरुको सुरक्षा, सुरक्षित काम गर्ने वातावरण, वृत्ति विकास तथा उच्च शिक्षा अध्ययनको अवसरको सुनिश्चितता गर्न, देशमा शिक्षा तथा स्वास्थ्य क्षेत्रमा भएको लगानीको सुरक्षाको सुनिश्चितता गर्न र नेपाललाई मेडिकल, नर्सिङ तथा पारामेडिकल शिक्षाको गन्तव्य बनाउने नीति अख्तियार गर्दै शिक्षण संस्थाहरुमा कोटा प्रणाली खारेज गर्न माग गरेका छन् ।