मन्त्रिपरिषद हेरफेर गर्दा गृहमन्त्रीबाट श्रेष्ठलाई हटाउन प्रधानमन्त्री प्रचण्डलाई सत्ता पक्ष र विपक्षबाट दवाव

२८ साउन, काठमाडौं । प्रधानमन्त्री पुष्पकमल दाहाल 'प्रचण्ड'लाई उपप्रधान तथा गृहमन्त्रीबाट नारायणकाजी श्रेष्ठलाई हटाउन सत्ताभित्र र बाहिरबाट दवाव बढेको छ । जनमत पार्टीलाई सरकारमा सहभागी गराउन माओवादीबाट सरकारमा गएका एक मन्त्रीलाई फिर्ता गराउने तयारी गरिरहेका प्रधानमन्त्री प्रचण्डलाई अरू मन्त्रीको सट्टा गृहमन्त्री श्रेष्ठलाई हटाउनुपर्ने दवाव आएको माओवादीका एक नेताले नेपालबहसलाई बताए । 

प्रधानमन्त्री प्रचण्ड आइतबार नै मन्त्रिपरिषद हेरफेर गर्ने तयारी गरेका छन् । तर, उनलाई पार्टीबाट गृहमन्त्रीबाट श्रेष्ठलाई हटाउनुपर्ने दवाव बढेको छ । आफ्नो नेतृत्वको सरकार बचाउनका लागि पनि अहिले नारायणकाजीलाई मन्त्रीबाट हटाउन आवश्यक देखिएको ति नेताको भनाइ छ । प्रमुख प्रतिपक्षी दल नेकपा एमालेले सुन तस्करी प्रकरणलाई लिएर गृहमन्त्रीको राजीनामा मागिरहेका बेला माओवादीभित्र र सरकारमा सहभागी दलका तर्फबाट पनि उनलाई हटाउनु पर्ने दाव बढेको छ । 

सांसद सुनील शर्मा पक्राउन प्रकरणलाई लिएर सत्ता पक्षको ठूलो दल नेपाली कांग्रेसले पनि गृहमन्त्री श्रेष्ठले राजीनामा दिनुपर्ने मत बाहिर ल्याएको छ । शुक्रबार बसेको कांग्रेस संसदीय दलको बैठकमा बोल्ने १९ सदस्यमध्ये अधिकांशले गृहमन्त्रीलाई नहटाउने हो भने कांग्रेसले गठबन्धनबारे विचार गर्नु पर्ने भन्दै सभापति शेरबहादुर देउवालाई चाँडो निर्णय लिन आग्रह गरेको थिए । 

आज पनि कांग्रेसको संसदीय दलको बैठक चलिरहेको छ । बैठकमा बोल्न बाँकी रहेका सदस्यहरूले पनि सरकारको कामकारवाही र गृहमन्त्री श्रेष्ठको रवैयाबारे प्रश्न उठाइरहेका छन् । सुन प्रकरणमा गृहमन्त्री श्रेष्ठले लिएको नीतिप्रति माओवादी भित्र पनि विवाद देखिएको छ । नेताहरू अग्नि सापकोट, जनार्दन शर्मा, वर्षमान पुन र शक्ति बस्नेतलगायत नेताहरूले पनि प्रधानमन्त्री प्रचण्डलाई सत्ता गठबन्धनमा रहेका दल र मुख्य गरी नेपाली कांग्रेससँग छलफल गरेर एकपटक मन्त्री मण्डललाई पुनर्गठन गर्न सुझाव दिएका छन् ।   

पार्टीका नेताहरूले गृहमन्त्रीको काम कारवाहीप्रति नकारात्मक धारणा बनाइ रहेकाले आन्तरिक विवादलाई मिलाएर मन्त्रिपरिषद विस्तार गर्ने तयारीमा रहेका प्रधानमन्त्री प्रचण्डले चितवनबाट फर्किएर जनमतलाई सरकारमा सहभागी गराउने तयारी गरेका थिए । तर, चारैतिरबाट गृहमन्त्री श्रेष्ठलाई गृहमन्त्रीबाट हटाउनुपर्ने दवाव आइरहेकाले प्रधानमन्त्री अप्ठ्यारोमा परेका छन् । उनले माओवादी मन्त्री भएका सुदन किराँती वा अमनलाल मोदी मध्ये एक जनालाई फिर्ता बोलाएर जनमतबाट मन्त्री बनाउने तयारी गरेका थिए ।   

समर्थन दिएपनि सरकारमा सहभागी नभइरहेको जनमत पार्टीलाई एक मन्त्री दिएर सरकारमा सहभागी गराउन मन्त्रिपरिषद हेरफेर गर्न लागेका प्रधानमन्त्रीको कार्यक्रम आज रोकिने अवस्था पनि देखिएको छ । प्रचण्डले माओवादीबाट मन्त्री भएका मध्ये कसलाई फिर्ता बोलाउने भन्ने टूंगो अहिलेसम्म गरेका छैनन् । उनले आफ्नो पार्टीका एक मन्त्रीलाई फिर्ता बोलाएर त्यस ठाउँमा जनमतबाट मन्त्री नियुक्ति गर्न लागेको थिए ।  कुन मन्त्रीलाई हटाउने भन्ने सोच बनाइरहेका बेला गृहमन्त्री हटाउन दवाव आएपछि प्रचण्ड अप्ठ्यारोमा परेको माओवादी नेताको भनाइ छ । 

माओवादी केन्द्रबाट सामान्य प्रशासनमा अमनलाल मोदी, उर्जामा शक्तिबहादुर बस्नेत, पर्यटनमा सुदन किराँती, गृहमा नारायणकाजी श्रेष्ठ र संचारमा रेखाकुमारी शर्मा मन्त्री छन् । यी मध्ये एकलाई हटाएर जनमतकी अनितादेवी साहलाई नियुक्ति गर्ने भएको हो । प्रधानमन्त्री प्रचण्डको नेतृत्वमा २५ सदस्यीय मन्त्रिपरिषद कायम छ ।