प्रधानमन्त्री प्रचण्डद्वारा ८ औँ पटक मन्त्रिपरिषद विस्तार, जनमतकी अनितादेवी बनिन सामान्य प्रशासनमन्त्री

२९ साउन, काठमाडौं । प्रधानमन्त्री पुष्पकमल दाहाल प्रचण्डले ७ महिनामा ८ औं पटक मन्त्रिपरिषद पुनर्गठन गरेका छन् । जनमत पार्टीकी अनितादेवी साहलाई संघीय मामिला तथा सामान्य प्रशासनमन्त्री बनाएर प्रधानमन्त्री प्रचण्डले मन्त्रिपरिषद विस्तार गरेका हुन् । नवनियुक्त मन्त्री अनितादेवी साहले पद तथा गोपनीयताको शपथ लिएकी छन् । सोमबार बिहान शीतलनिवासमा आयोजित समारोहमा राष्ट्रपति रामचन्द्र पौडेलले उनलाई शपथ गराएका हुन् ।

प्रधानमन्त्री प्रचण्डले उनलाई संघीय मामिला तथा सामान्य प्रशासन मन्त्रालयको जिम्मेवारी दिएका छन् । उनी जनमत पार्टीकी सांसद हुन् । यसअघि, नेकपा माओवादी केन्द्रका तर्फबाट सामान्य प्रशासनमन्त्री रहेका अमनलाल मोदीलाई फिर्ता बोलाइएको थियो । प्रचण्ड गत पुस १० मा माओवादी केन्द्रबाट मुलुकको तेस्रो प्रधानमन्त्री बनेका थिए । आइतबार नै उनले आफ्नो दलबाट संघीय मामिला तथा सामान्य प्रशासनमन्त्री रहेका अमनलाल मोदीलाई सरकारबाट फिर्ता बोलाएर जनमतका लागि स्तान दिएका थिए । 

जनमत पार्टीले पनि एक साताअघि नै मन्त्रीका लागि अनितादेवी साहको नाम सिफारिस गरिसकेको थियो । संसदमा कुनै पनि दलको स्पष्ट बहुमत नभएको अवस्थामा तेस्रो ठूलो दलबाट प्रधानमन्त्री बनेका प्रचण्ड आफ्नो सत्तालाई स्थिरता दिन पटक–पटक मन्त्रिपरिषद्को पुनर्गठन र हेरफेर गर्नुपर्ने बाध्यात्मक अवस्थामा रहँदै आएका छन् । 

पुस २६ मा २ सय ६८ सांसदको विश्वास पाएका प्रचण्डसँग अहिले सत्तापक्षमा १ सय ५६ मात्र सांसद छन् । पुस १० मा एमाले, रास्वपा, राप्रपा, जनमत पार्टी र नागरिक उन्मुक्ति पार्टीलाई साथ लिएर प्रधानमन्त्री नियुक्त भएका प्रचण्डले त्यसको भोलिपल्टै  ८ सदस्यीय मन्त्रिपरिषमा माओवादी केन्द्रसहित एमाले, रास्वपा र जनमत सहभागी भएका थिए । माघ ३ मा राप्रपालाई समेत सहभागी गराउँदै प्रधानमन्त्री प्रचण्डले २३ सदस्यीय मन्त्रिपरिषद् विस्तार गरेका थिए । जसमा एमालेका विष्णुप्रसाद पौडेल, माओवादी केन्द्रका नारायणकाजी श्रेष्ठ, रास्वपाका रवि लामिछाने र राप्रपाका राजेन्द्र लिङ्देन उपप्रधानमन्त्री भएका थिए । 

माघ १३ मा सर्वोच्च अदालतको आदेशबाट तत्कालीन उपप्रधान तथा गृहमन्त्री रवि लामिछाने पदमुक्त भएपछि प्रधानमन्त्री बनेको एक महिनामै प्रचण्ड नेतृत्वको मन्त्रिपरिषद् अस्थिर बनेको थियो । रास्वपा सरकारबाट बाहिरिएपछि रास्वपाले सम्हालिरहेका थप दुई मन्त्रालय शिक्षा, विज्ञान तथा प्रविधि र श्रम, रोजगार तथा सामाजिक विकासको जिम्मेवारी पनि प्रचण्ड आफैंले सम्हालेका थिए । चैत १७ मा संसद्को सबैभन्दा ठूलो दल कांग्रेस प्रचण्ड नेतृत्वको सरकारमा सहभागी भएको थियो । कांग्रेसकै कारण प्रधानमन्त्री प्रचण्डले थप तीन पटक मन्त्रिपरिषद पुनर्गठन गर्नुपर्याे ।  

खड्कासहित ४ मन्त्री पठाएको कांग्रेसले थप ५ मन्त्रालयमा तीन किस्तामा मन्त्री पठायो । वैशाख ३ मा एनपी साउद परराष्ट्रमन्त्री, वैशाख २० मा धनराज गुरुङ कानुन, न्याय तथा संसदीय मामिलामन्त्री, मोहनबहादुर बस्नेत स्वास्थ्य तथा जनसंख्यामन्त्री र डिगबहादुर लिम्बू युवा तथा खेलकुदमन्त्री र वैशाख २४ मा सुरेन्द्र आचार्य महिला, बालबालिका तथा ज्येष्ठ नागरिकमन्त्री नियुक्त गरिए ।

नेपाल समाजवादी पार्टीका महिन्द्र राय यादवलाई खानेपानी मन्त्रालयमा सरुवा गरेर आचार्यलाई उनको जिम्मेवारी दिइयो । प्रधानमन्त्री प्रचण्डले पछिल्लो पटक जेठ ९ मा जसपाका वीरेन्द्रप्रसाद महतोलाई वन तथा वातावरणमन्त्री नियुक्त गर्न फेरि मन्त्रिपरिषद् पुनर्गठन गरेका थिए ।  आज सोमबारसमेत गर्दा ८ औँ पटक मन्त्रिपरिष पुनर्गठन भएको छ ।