केन्द्रीय समितिबाट नभएका केही निर्णय संसदीय दलबाट गराउने कांग्रेसको तयारी, दलको बैठकमा पनि देउवा शान्त

२९ साउन, काठमाडौं । नेपाली कांग्रेसको संसदीय दलको बैठक आज पनि जारी छ । शुक्रबारदेखि चलेको बैठकमा सांसदहरुले आफ्नो धारणा राखिरहेका छन् । दलको बैठकमा केन्द्रीय समितिमा भन्दा आफ्ना कुरा राख्न सहज भएको नेताहरूको भनाइ छ । सांसदहरुको बोल्ने काम आज सकेर सभापति देउवा बैठकमा उठेका प्रश्नको जवाफ दिनेछन् । आजै बैठकले केन्द्रीय समितिमा हुन नसकेका केही विषयहरूमा कांग्रेसको धारण सार्वजनिक गर्ने भनिएको छ । 

शुक्रबारबाट सुरु भएको दलको बैठक विगत बैठकभन्दा फरक रहेको नेताहरू बताउँछन् । संसदीय दलमा लगातार यसरी कम मात्र छलफल भएका छन् । यसपटक सभापति देउवा केन्द्रीय समितिको बैठकमा भन्दा पनि शान्त भएर बसेका छन् । बैठकमा सबै सदस्यहरूलाई पालैपालो बोल्नका लागि उनैले समय दिएका छन् । बोलिसकेका अधिकांश सदस्यले सरकारको आलोचना गरेका छन भने यस्तो कठिन अवस्थामा कांग्रेस चुप लागेर बस्न नहुने भन्दै सभापति देउवालाई तत्काल कुनै निर्णयमा पुग्न सुझाव दिइरहेका छन् । 

संसदीय दलको बैठकले वर्तमान देशमा देखिएका र सरकारका विषयमा कांग्रेसले केही भनाइहरु बाहिर ल्याउने तयारी गरेको छ । बैठकमा सहभागी नेताको भनाइमा सात विषयमा सुरु भएको छलफलमा अरू धेरै विषयहरू थपिएका छन् । अन्तिममा बोल्ने पालो सभापतिको भएकाले अहिले नै यही विषयमा कांग्रेसले फोकस गरेर निर्णय सार्वजनिक गर्छ भन्ने एकिन छैन । बैठकमा संस्थापन पक्षका संसदहरूले यसै अनुसार अगाडि जानुपर्छ भन्न सकेका छैनन् । 

केन्द्रीय समितिको बैठकपछि यति बेला कांग्रेसका प्रायः नेताहरू पार्टीको काममा खटिएका छन् । सबैलाई जिम्मेवारी दिएर देउवाले संसदीय दलको बेठक सुरु गरेका हुन् । सांसद नभएका जति केन्द्रीय सदस्यसहितका नेताहरू यति बेला जिल्ला जिल्लामा छन् । कांग्रेसले साउन २० देखि सुरु गरेको पार्टी संगठन सुदृढीकरणको अभियान जारी छ । ७७ वटै जिल्लामा चलिरहेको यो अभियान भोलि साउन ३० गते सकिँदैछ ।  

जिल्ला नगएका सांसदहरुलाई राखेर देउवाले दलको बैठकमा छलफल गराइरहेका छन् । एकैपटक कांग्रेस नेताहरू पार्टीका छलफलमा व्यस्त भएको पनि यो पहिलो पटक नै हो । जिल्लाको १० दिने अभियान भोलि सकिनेछ भने संसदीय दलको बैठकमा आज बोल्ने काम नसकिए भोलिसम्म लम्बिने नेताहरूको भनाई छ । संघीय संसद भवन, नयाँ बानेश्वरमा जारी बैठक बिहान १० बजेदेखि चलिरहको छ ।  बैठकमा समसमायिक राजनीतिक विषय, सांसद सुनील शर्मा प्रकाउ प्रकरण देखी सुन प्रकरणमा उच्चस्तरीय छानबिन समिति बनाउने कि नबनाउने ? भन्ने विषयमा छलफल भइरहेको छ । 

हिजोसम्म उक्त बैठकमा ५४ सांसदहरुले आ आफ्नो धारणा राखिसकेका छन, आज बाँकी सदस्यहरूले आ आफ्नो धारणा राख्ने छन् ।  तस्करीको क्विन्टल सुन बरामदको तीन सातासम्म पनि मुख्य नाइके पत्ता नलाग्नु र प्रहरीको केन्द्रीय अनुसन्धान ब्युरो (सीआईबी) ले तस्करसँग राजनीतिक शीर्षस्थ नेताहरूको संलग्नताबारे खुलासा गर्दा समेत अनुसन्धान नबढाइएको भन्दै कांग्रेसभित्र चर्कै बहस भइरहेको छ ।