उचित कर लगाएर सुनको आयात खोल्नुपर्छ: देउवा

२९ साउन, काठमाडौं । नेपाली कांग्रेसका सभापति शेरबहादुर देउवाले सुन आयात खोल्नुपर्ने बताएका छन् । कांग्रेस संसदीय दलको बैठकमा सभापति देउवाले उचित कर लगाएर सुन आयात खोल्नुपर्ने बताएका हुन् । सुनको आयात खुलाको नीति नहुँदा तस्करी मौलाएको र यसको दीर्घकालीन समाधान  कर लगाएर आयात खोल्दा मात्र हुने उनले बताए ।

संसदीय दलको बैठकलाई सोमबार सम्बोधनका क्रममा पूर्वप्रधानमन्त्रीसमेत रहेका देउवाले सुन आयात न्यूनतम कर लगाएर खोल्नुपर्यो नत्र यो समस्या जहिले पनि रहिरहने बताए । क्विन्टल सुन तस्करीको विषयमा छानबिन माग गर्दै एमालेले संसद अवरोध गरिरहेका बेला कांग्रेसले संसदीय दलको बैठक बोलाएको हो । तीन दिन बसेको बैठकको अन्तिममा आज देउवा बोलेका थिए । दलको बैठकका निर्णय भने आउन बाँकी छ ।