सर्वसाधारण लागि खुला गरिँदै खुलामञ्च, सम्याउने काम हुँदै

३० साउन, काठमाडौं । काठमाडौंकाे एक मात्र ठूला क्षेत्रफल भएको खुला स्थान खुलामञ्च सर्वसाधारणका लागि खुला गर्ने तयारी अन्तिम चरणमा पुगेको छ । सोमबारदेखि काठमाडौं महानगरपालिकाले एक्जाभेटरको सहायता यहाँ रहेका गेग्रान र फोहोर हटाउने काम सुरु गरेको छ । 

भूकम्पपछि खुलामञ्चभित्र अस्थायी टहरा बनाएर दरबार हाईस्कूलका विद्यार्थीलाई पढाउने काम भएको थियो । पछि हाईस्कूल निर्माण भएपछि दुई वर्ष पहिल्यै विद्यार्थीहरुलाई स्कूलमा सारिएपनि खुला गरिएको थिएन । बेलाबखत राजनीतिक दलका लागि आमसभा गर्न दिइएको थियो । सभासकेपछि बन्द गरिँदै आएकामा अबदेखि खुला गर्ने भएको हो ।  विभिन्न  सभा, सम्मेलन गर्न समेत खुला रहनेछ । खुलामञ्च मुलुकको परिवर्तनमा आवाज बुलुन्द गर्ने मुख्य थलोको रुपमा चित्रित छ । साथै विपद्का बेला खुला सास फेर्ने स्थान मानिन्छ ।

भूकम्पपछि केही वर्ष खुलामञ्चको एक तिहाई जति क्षेत्रमा पुरानो बसपार्कबाट चल्ने भाडाका सवारीलाई पार्क गर्न दिइएको थियो । पार्क संचालन गर्दा व्यापारीले गिद्धेनजर लगाएकाे पाइएपछि विराेध भएकाे थियाे । त्यसपछि अभियन्ता र सरोकारवालाहरुको विरोध र महानगरको तदारुकतापछि पार्क रद्द गरिएको थियो । डोजरले बसपार्क बनाउँदा गरेको पिच भत्काउन सुरु गरेको छ ।

त्यसपछि पनि सर्वसाधारणका लागि खुला गर्न नमानिरहेको महानगर योपटक खुलामञ्च खुला गर्न तयार भएको हो । यसमा महानगरमा मेयर बालेन्द्र साहले जोडदार अग्रसरता लिएका छन् । उनले खुलामञ्च खोल्ने र व्यवस्थापन गर्ने जिम्मा महानगरका वडा नं. २७ र २८ लाई दिएका छन् । चौरमा दुबो, फूलका बिरुवा रोप्ने तयारी गरेको छ ।