एलओडी क्लबमा राजश्वको छापा, उपस्थितिका लागि संचालकलाई पत्र

३० साउन, काठमाडौं । ठमेलको लर्ड अफ् द ड्रिङ्क्स (एलअ‍ोडी) नाइट क्लबमाथि राजश्व अनुसन्धानले छानबिन सुरू गरेकाे छ । अनुसन्धानका लागि क्लबको बैक खाता रोक्का गरिएको छ । 

कर छली गरेको सूचनाका आधारमा राजश्व अनुसन्धान विभागले गएको शुक्रबार र शनिबार २ दिन छापा मारेको थियो । क्लबमा प्रवेश गर्नेहरूसँग उठाएको रकमभन्दा न्यून मात्रामा रकम देखाएर कम राजश्व बुझाएको पाइएको विभागले जनाएको छ । विभागले क्लबबाट दैनिक हुने व्यापार र तिरेको कर, स्टक बुक र लेखा खाता नियन्त्रणमा लिएको बताइएको छ । 

क्लबका सञ्चालकहरु रुदीप श्रेष्ठ, भुपेन कुवँर, राजु सिंह सुवाल र श्याम सुन्दर अग्रवाल रहेका छन् । उनीहरूलाई विभागमा हाजिर हुन पनि विभागले पत्राचार गरिएको छ । 

यसअघि उमेर नपुगेका नाबालिगलाई क्लब प्रवेश दिएको आरोपमा पनि प्रहरीले सञ्चालकहरुमाथि अनुसन्धान गरेको थियो । क्लबमा अनधिकृत रुपमा प्रवेश दिएको विषय क्लबबाट रातको समयमा एक पुरुषले घुम्न लगेकी एक नाबालिकालाई ललितपुर पुर्याएर बलात्कार गरेको घटना बाहिरिएको थियो । बलात्कार घटनामा एक जनालाई ललितपुर प्रहरीले पक्राउ गरी अनुसन्धान गरिरहेको छ ।