टल्किने ढुंगा ‘क्वार्ज क्रिष्टल’ गोरखा राख्नुपर्ने स्थानीयको माग

३० साउन, काठमाडौं । बहुमूल्य खनिज ‘क्वार्ज क्रिष्टल’ (टल्किने ढुंगा) गोरखामै राख्नुपर्ने माग स्थानीयले गरेका छन् । उनीहरुले आज प्रधानमन्त्री प्रचण्डलाई भेटेर ज्ञापन पत्र बुझाउँदै यस्तो माग राखेका हुन् । 

उक्त ढुंगा गोरखाबाहिर नलैजान मागसहित ज्ञापन पत्र गोरखा क्षेत्र नम्बर १ का सांसद राजेन्द्र बजगाई, गोरखा नगरपालिकाका मेयर कृष्णबहादुर राना मगरलगायत प्रतिनिधिमण्डलले आज बिहान बालुवाटारमा भेट गरेको हो । 

भेटमा प्रचण्ड ढुंगा गोरखामै राख्न सकारात्मक रहेको आश्वसन दिएका सहाभागीहरुले बताएका छन् । स्थानीय चन्द्रमान शाहीको घरमा पुस्तौंदेखि राखिराखेको ढुंगा स्थानीय प्रशासनले लिएर भूगर्भविद्हरु झिकाएर परीक्षण गर्दा क्वार्ज क्रिष्टल भएको पुष्टि भएको छ । त्यसपछि खानी तथा भूगर्भ विभागले सुरक्षाकाे कारण देखाउँदै काठमाडौं ल्याउने तयारी गरेपनि स्थानीय विपक्षमा उभिएका हुन् । 

गोरखा नगरपालिकाले सर्वपक्षिय भेला गरेर क्वार्ज क्रिष्टल गोरखा दरबारसँगै रहेको कालिका मन्दिरमा राख्ने निर्णय गरिसकेको अवस्था छ । परीक्षणका लागि प्रशासनले काठमाडौं ल्याउन खोज्दा स्थानीयले जिल्लामै विज्ञ झिकाएर परीक्षण गरिनुपर्ने माग राखेपछि विज्ञ टोली गोरखा पुगेको थियो । 

यो ढुंगा बहुमल्य खनिजमध्ये सबैभन्दा महंगो दर्जमा दोस्रोमा पर्ने जनाइएको छ ।