अधिकारकर्मीमाथि कुटपिट घटनाप्रति मानवअधिकार आयोगकाे चासाे

३० साउन, काठमाडौं ।  राष्ट्रिय मानवअधिकार आयोगले मानव अधिकारकर्मी तथा पत्रकार मनोहर पोखरेलमाथि दुर्व्यवहार र कुटपिट गर्ने दोषीलाई कारबाहीको दायरामा ल्याउन सरकारको ध्यानाकर्षण गराएको छ ।

मंगलबार मानव अधिकार आयोगका प्रवक्ता डा. टीकाराम पोखरेलले एक प्रेस विज्ञप्ति जारी गर्दै घटनाको निष्पक्ष अनुसन्धान र दोषीलाई कारबाहीको दायरामा ल्याउन सरकारको ध्यानाकर्षण गराएका हुन् । मानवधिकार र संचारकर्मीहरुको सुरक्षामा विशेष ध्यान दिन समेत माग गरिएको छ । 

मानव अधिकारकर्मी तथा पत्रकार मनोहर पोखरेललाई साेमबार जिल्ला प्रहरी कार्यालय सप्तरीकाे परिसरमा सेवाग्राहीको काम विशेषले गएको समयमा उक्त कार्यालयमा कार्यरत प्रहरीले बिना कारण नियन्त्रणमा लिएर दुर्व्यवहार र कुटपिट गरेको थियो । 

घटनाबारे आयोगको मधेश प्रदेश आयोगले पीडितको उजुरी लिएर अनुसन्धान गरिरहेको समेत विज्ञप्तिमा उल्लेख छ ।