मध्यरातमा सीआईबीसँग माधव नेपालले भने, ‘मैले बिराएको छैन, अपराध गरेको छैन, लेनदेन गरेको छैन’

३० साउन, काठमाडौं । ललितानिवास जग्गा अनियमिततामा अनुसन्धान गरिरहेको प्रहरीको केन्द्रीय अनुसन्धान ब्यूरो सीआईबीले यसमा नाम मुछिएका पूर्वप्रधानमन्त्री माधवकुमार नेपालसँग सोमबार राती बयान लिएको छ । सीआईबीले मुद्दाको अनुसन्धानका लागि बोलाएपछि सोमबार बेलुका नेता नेपाल सीआईबीसमक्ष पुगेका थिए । 

उनी बयान सकाएर मध्य राति निवास फर्किएको सीआईबीले जनाएको छ । सीआईबीले बयानमा बोलाएपछि उनी युरोप भ्रमणबाट सोमबार बिहानै स्वदेश फर्किएका थिए । ललितानिवासको सरकारी जग्गा व्यक्तिका नाममा सारेर सट्टाभर्ना गर्ने निर्णय तत्कालीन प्रधानमन्त्री नेपालको पालामा भएको थियो । उक्त प्रकरणमा सयौं रोपनी जग्गा हिनामिना भएको अख्तियारको ठहर छ । 

पूर्व प्रधानमन्त्रीद्वय बाबुराम भट्टराई र माधवकुमार नेपाललाई पनि बोलाएर बयान लिन सीआईबीलाई सर्वोच्चले आदेश दिएको थियो । बालुवाटार जग्गा प्रकरणमा आफ्नो नाम मुछिएपनि आफूले कुनै कमजोरी नगरेको भन्दै त्यसको छानबिनका लागि सहयोग गर्न तयार रहेको उनले बयानका क्रममा बताएका छन् । उनले बयानमा आफूले कुनै अपराध नगरेको, कसैसँग लेनदेन नगरेको बताएका थिए । 
 
ललितानिवास जग्गा प्रकरणमा २०६६ र २०६७ सालमा माधवकुमार नेपाल नेतृत्वको सरकारले केही विवादास्पद निर्णय गरेको थियो । २०६९ सालमा डा. बाबुराम भट्टराईको सरकारले सरकारी जग्गा पशुपति टिकिन्छा गुठीका नाममा लैजाने निर्णय गरेको थियो । 

नेता नेपाल प्रधानमन्त्री हुँदा बालुवाटारस्थित विशिष्ट व्यक्तिको निवास विस्तार सम्बन्धमा मन्त्रिपरिषदबाट पटक–पटक निर्णय भएका थिए । तीनै निर्णयका आधारमा सरकारी जग्गा नक्कली मोही हुँदै व्यक्तिको नाममा पुगेको थियो । तिनै मन्त्रिपरिषदका निर्णयमा आधारित भई सीआईबीले उनीसँग बयान लिएको हो । नेता नेपालसँग एक चरणमा बयान सकिएको र आवश्यक परे थप बयान लिइने सिआइबीका एक उच्च अधिकारीले बताए । 

गत २१ साउनमा सर्वोच्च अदालतले ललितानिवास जग्गा हिनामिनासम्बन्धी नीतिगत निर्णयमा संलग्न पदाधिकारीलाई पनि अनुसन्धानको दायरामा ल्याउन आदेश दिएको हो । सोही आदेश कार्यान्वयन गर्ने क्रममा नेता नेपालसँग पनि बयान लिइएको सीआईबीको भनाइ छ । बयान लिए पनि मुद्दा चल्ने–नचल्ने प्रस्ट भएको छैन । सीआईबीले अर्का पूर्वप्रधानमन्त्री डा. बाबुराम भट्टराईलाई पनि बयानमा बोलाएको छ । उनी मंगलबार राती बयानका लागि जाने बुझिएको छ ।