पार्टीका उपाध्यक्ष कृष्णबहादुर महरा र उनका छोरामाथि सीआईबीले छिट्टै छानबिन गर्छः प्रधानमन्त्री

३० साउन, काठमाडौं । प्रधानमन्त्री पुष्पकमल दाहाल ‘प्रचण्ड’ले नेकपा माओवादी केन्द्रका उपाध्यक्ष कृष्णबहादुर महरा र छोरा राहुलमाथि छिट्टै सीआइबीबाट छानबिन हुने बताएका छन् । 

मंगलबार बालुवाटारमा संचारकर्मीहरुसँगको भेटघाट कार्यक्रममा माओवादी केन्द्रका अध्यक्षसमेत रहेका प्रचण्डले उपाध्यक्ष महरा कृष्णबहादुर महरा र उनका छोरा राहुलमाथि छानबिन थालिने जानकारी दिएका हुन् । प्रधानमन्त्री भेट्न पत्रकारको एक टोली बालुवाटार पुगेको थियो । सोही अवसरमा पार्टीका उपाध्यक्ष कृष्णबहादुर महरा र उनका छोरामाथि पनि सीआईबीले चाँडै छानविन गर्ने बताएका हुन् ।

विद्युतीय चुरोट (भेप)भित्र लुकाएर ९ किलोग्राम सुन तस्करी भएको भनिएको काण्डमा महरा र पुत्र राहुलको नाम मुछिएपछि प्रमुख प्रतिपक्षी नेकपा एमालेले संसद बैठकमा नै मुद्दा बनाइरहेको छ । भेप प्रकरणमा अन्यलाई पक्राउ गरी थुनामा राखेर अनुसन्धान जारी राखिएपनि महराका बाबु–छोरालाई सरकारले जोगाएको एमालेको आरोप छ । 

गृहमन्त्री नारायणकाजी श्रेष्ठले सुन तस्करी प्रकरणमा संलग्न जो कोहीलाई कानूनी दायरामा ल्याउने अभिव्यक्ति सार्वजनिक रुपमा दिइरहे पनि बाबु–छोरा खुला नै छन् । यसबाट सरकारको चर्को आलोचना भइरहेको छ । भेप प्रकरणमा मुख्य तस्कर चिनियाँ नागरिकसँग बाबु–छोराले दर्जनौं पटक फोनमा कुराकानी गरेको तथ्यसहित सीआईबीले तयार पारेको रिपाेर्टमा समेटिएकाे छ ।

भेटमा सरकार भ्रष्टाचारी, तस्कर र बिचौलिया हटाएर सुशासन कायम गराउने अभियानमा लागेको र यसमा साथ दिन संचारकर्मीहरुसँग आग्रह गरेका थिए ।

हाल सीआईबीले सय केजी सुन प्रकरणमाथि अनुसन्धान गरिरहेको छ । सुरुमा भन्सार विभागले छानबिन गरेपनि प्रधानमन्त्रीकै निर्देशनमा अन्तिम टुंगो लगाउन भन्सारले सीआईबीलाई जिम्मा दिएको हो ।

उपाध्यक्ष महरा यसअघि संसदको एक महिला कर्मचारीमाथि यौन दुर्व्यवहारको अभियोगमा लामो समय हिरासतमा बसेर छुटेका थिए । त्यसपछि राजनीतिक रुपमा निष्क्रिय रहँदै आएका उनलाई प्रचण्डले नै पुनः ‘फिल्ड’मा ल्याएका हुन् । उनलाई पार्टीमा उपाध्यक्ष बनाइएको छ । बिचमा उनलाई पार्टी प्रवक्ताको समेत जिम्मेवारी दिएकामा त्यहाँबाट हटाएर अहिले प्रवक्ताको जिम्मा अर्का उपाध्यक्ष अग्निप्रसाद सापकोटालाई दिइएको छ ।