१७९ जना यात्रु बोकेको एयर इन्डियाको विमानको ब्रेकमा समस्या आएपछि रनवेबाट पार्किङस्थलमा फर्काइयो

३० साउन, काठमाडौं । उडान भर्न लागेको एयर इन्डियाको काठमाडौं दिल्ली उडानको जहाज त्रिभुवन विमानस्थलमै रोकिएको छ ।  उडानका लागि तयार रहेको जहाजको ब्रेकमा समस्या आएको हो । मंगलबार त्रिभुवन अन्तर्राष्ट्रिय विमानस्थलमा उडानको लागि जहाज ट्याक्सी वे बाट रन वेमा प्रवेश गर्दै थियो । सोही क्रममा जहाजको ब्रेकमा समस्या देखिएको थियो ।

उडान नम्बर २१६ रहेको जहाजको काठमाडौं–दिल्लीको उडान थियो । उडान समय ४ बजेर १० मिनेटको थियो । जहाज उडानको लागि तयार भएर रन वेमा प्रवेश गर्ना साथ ब्रेकमा समस्या आयो । त्यसपछि जहाजलाई रन वेबाट नै पार्किङस्थलमा ल्याइएको विमानस्थलका प्रवक्ता सुवास झाले जानकारी दिए ।

जहाज टयाक्सी वेबाट रन वे प्रवेश गर्नको लागि घुम्ने क्रममा थियो । त्यस बेला ब्रेकमा समस्या आएपछि जहाजलाई ट्याक्टरले तानेर पार्किङमा ल्याइएको हो । उक्त जहाजमा १७९ जना यात्रु थिए । रन वेमै जहाजमा समस्या आएपछि अन्य उडान तथा अवतरण प्रभावित बनेको विमानस्थल व्यवस्थापनले जनाएको छ ।