संसद अवरोध हटाउनेबारे विभिन्न विकल्पमा एमालेसहितका दलहरुसँग वार्ता गर्ने गठबन्धनको निर्णय

३१ साउन, काठमाडौं । सत्ता गठबन्धनले एमालेसहितका दलहरूसँग संवादको प्रक्रियालाई तीव्रता दिने निर्णय गरेको छ । बैठकले विभिन्न विकल्पसहित दलहरुसँग वार्ता गर्ने निर्णय गरेको छ । बैठकमा सुन तस्कारी प्रकरणको छानविनलाई निगरानीमा राख्ने गरी संसदीय समितिलाई जिम दिन सकिने विषयमा पनि छलफल भएको थियो ।  

बुधवार बिहान प्रधानमन्त्रीको सरकारी निवास बालुवाटारमा बसेको बैठकमा नेताहरूले संसद्को गतिरोध खुलाउने विषयमा छलफल भएको हो । बैठकले संसद्को गतिरोध खुलाउन प्रमुख प्रतिपक्षी दल लगायत संसदमा प्रतिनिधित्व गर्ने दलहरूसँग संवादको प्रक्रियालाई तीव्रता दिने निर्णय गरेको प्रधानमन्त्रीको सचिवालयले जनाएको छ ।

बैठकमा प्रधानमन्त्री पुष्पकमल दाहाल प्रचण्ड, नेपाली कांग्रेसका सभापति शेरबहादुर देउवा, नेकपा एकीकृत समाजवादीका अध्यक्ष माधवकुमार नेपाल, उपप्रधानमन्त्रीहरू पूर्णबहादुर खड्का, नारायणकाजी श्रेष्ठ लगायतका नेताहरू सहभागी थिए ।

सुन तस्करी प्रकरणमा उच्चस्तरीय न्यायिक छानबिन समिति गठनको माग गर्दै नेकपा एमालेले निरन्तर संसद अवरुद्ध पार्दै आएको छ । गठबन्धनले न्यायिक छानबिन समिति गठनको आवश्यकता नभएको भन्दै राज्य व्यवस्था समितिलाई निगरानीको जिम्मा दिने गरी सहमति गर्न सकिने निष्कर्ष निकालेको छ ।