गायक अरिजीत सिंह आफ्नो लाइभ प्रस्तुति दिन पहिलो पटक नेपाल आउँदै

३१ साउन, काठमाडौं । विश्व प्रख्यात भारतीय गायक अरिजीत सिंह, आफ्नो प्रस्तुति दिन नेपाल आउँदै । आयोजक ग्यारेज इन्टरटेनमेन्ट र एम.एन. प्रोडक्सनका अनुसार “अरिजीत सिंह लाइभ ईन नेपाल”, नोभेम्बर २५ (मंसिर ९ गते) शनिबार हायात ग्राउन्ड, चावहिलमा आयोजना हुने तय भएको छ। 

आफ्नो सुमधुर आवाज र सङ्गीतका धनी अरिजीत सिंह नेपाली श्रोताहरूमाझ पनि निकै रुचाइएका गायकमा पर्दछन् । भारतीय पार्श्व गायकका रुपमा परिचित अरिजीत सिंह “तुम हि हो”, “केसरिया तेरा”, “झुमे जो पठान”, “खैरियत”, “अपना बना ले” जस्ता थुप्रै लोकप्रिय हिन्दी गीतहरूका लागि परिचित छन्।

ग्यारेज इन्टरटेनमेन्ट र एम.एन. प्रोडक्सन द्वारा आयोजित यस कार्यक्रमले नेपालको मनोरञ्जनको क्षेत्रमा ठूलो योगदान गर्ने विश्वास रहेको आयोजकको बुझाइ छ । विगतका दिनहरूमा पनि यस्तै थुप्रै कार्यक्रम हरू आयोजना गर्दै आएको र आगामी दिनहरूमा पनि यस क्षेत्रलाई थप उचाइमा पुर्याउनुका लागि मद्दत गर्ने आयोजकको भनाई छ।

“अरिजीत सिंह लाइभ ईन नेपाल” को साधारण टिकट मूल्य रु. ४००० बाट सुरु हुने तथा थप सुविधाहरू सहित अरु टिकट दरहरू समेत उपलब्ध हुने आयोजक ले जनाएका छन् । अगस्त १५ (श्रावण ३०) बाट बिक्री खुल्ला हुने सो टिकट खल्ती डिजिटल वालेट बाट मात्रै खरिद गर्न सकिने छ।

नेपालमा विगत लामो समयदेखि विभिन्न कलाकार, सर्जक, गायक तथा सङ्गीतकारहरू लाई एउटै छाता मार्फत व्यवस्थापन, संगीत सिर्जना, वितरण तथा कन्सर्टहरु आयोजना गर्दै आएको ग्यारेज इन्टरटेनमेन्ट र एम.एन. प्रोडक्सनले नेपालमा यस क्षेत्रको विकासका लागि थप योगदान पुर्याउने हेतुले भविष्यमा पनि यस्तै प्रकारका कार्यक्रमहरू आयोजना गर्ने जनाएको छ।