एक लाख टन चामलका लागि भारतलाई पत्र

३१ साउन, काठमाडौं । सरकारले मुलुकमा चामल अभाव टार्न एक लाख ५५ हजार टनका खरिदका लागि भारतलाई पत्र पठाएको छ ।

भारतले यही साउन ६देखि बासमती बाहेक अन्य चामल निर्यातमा बन्देज लगाएको छ । त्यसबाट नेपालले चामल आयात गर्न सकेको छैन । देशभित्र भएका चामलले मात्र आवश्यक खाद्यन्न धान्न नसक्ने भएपछि उद्योग, वाणिज्य तथा आपूर्ति मन्त्रालयले भारतसँग निर्यात खुला गर्न पठाएको हो । 

एक लाख टनभित्र चिनी समेत समावेश गरिएको छ । उद्योग मन्त्रालयको अनुरोधमा परराष्ट मन्त्रालयले पत्र भारतीय राजदूतावासमार्फत भारत सरकारलाई पठाएको हो । भारतले भने अहिलेसम्म जवाफ नपठाएको परराष्ट्रले जनाएको छ । चामलका लागि परराष्ट्रमार्फत भारत सरकारलाई पत्राचार गरेकाे उद्योग, वाणिज्य तथा आपूर्ति मन्त्री रमेश रिजालले स्वीकारेका छन् ।

खाद्य व्यवस्था तथा व्यापार कम्पनीसँग न्यूनतम ३ लाख क्विन्टल खाद्यान्न मौज्दात हुनुपर्नेमा ९५ हजार क्विन्टल मात्रै रहेको बताइएको छ । सार्क फुड बैंकमा पनि छैन चामल मौज्दात न्यून रहेको बताइएको छ ।

कृषिमा आत्मनिर्भर बनाउने सरकारको घोषणा निकम्मा सावित भएको भन्दै विज्ञहरुले सरकारको आलोचना गरेका छन् । सरकारको अकर्मण्यताका कारण नेपालहरु कृषिजन्य उपजमा ८० प्रतिशतसम्म विदेशी आयातमा निर्भर हुनुपर्ने विवशता रहेको उनीहरुको भनाइ छ ।