पुष्पा टण्डनकाे मृत्यु प्रकरणमा रूपेन्देहीमा एक महिलासहित ४ जना पक्राउ

३१ साउन, काठमाडौं । रुपन्देही तिलोत्तमा नगरपालिका–४ की ३६ वर्षीया पुष्पा टण्डनको मृत्यु प्रकरणमा प्रहरीले एक महिलासहित ४ जनालाई पक्राउ गरेको छ ।

पुष्पाको मृत्युलाई लिएर आत्महत्या दुरुत्साहन कसुरमा परेको किटानी जाहेरीका आधारमा पुष्पाका छिमेकी रञ्जित भुसाल र उनकी पत्नी लक्ष्मी पोखरेल भुसालसहित चार जनालाई पक्राउ गरेको इलाका प्रहरी कार्यालय बुटवलले जनाएको छ । अन्य दुई जनाको भने परिचय खुलाइएको छैन । 

गुल्मी दरबार गाउँपालिकाकी पुष्पा टण्डन छोरा र छोरीको साथमा तिलोत्तमा नगरपालिका–४ स्थित ड्राइभरटोलमा बस्दै आएकी थिइन् । यही २७ साउनमा सालझण्डी नजिकै फायरलाइनमा रुखमा झुण्डिएको अवस्थामा उनको शव भेटिएको थियो । उनका आफन्तले पुष्पालाई हत्या गरेर अपराध छल्न झुण्ड्याइएको भन्दै विभिन्न व्यक्तिविरुद्ध किटानी जाहेरी दिएका छन् । 

घटनाका बेला पुष्पाका श्रीमान वैदेशिक रोजगारीको सिलसिलामा कोरियामा थिए । पुष्पाको मृत्युपछि घर आएका छन् । पुष्पासँग भुसाल दम्पत्तिको आर्थिक कारोबार रहेको खुलेको दाबी प्रहरीको छ । पुष्पाकाे शवनजिकै २० पानाको सुसाइड ‘नोट’ समेत प्रहरीले फेला पारेकाे थियाे । 

पुष्पाको आत्मत्या नभई हत्या भएको भन्दै दोषीलाई कारवाहीको दायरामा ल्याउन स्थानीय महिलासहित अधिकारकर्मीहरुले बुटवलमा प्रदर्शन समेत गरेका थिए । उनीहरुले पुष्पा टण्डनलाई न्याय दिन माग गर्दैै आइरहेका छन् ।