वाणिज्य बैंकहरुको नयाँ ब्याजदर सार्वजनिक, ग्लोवल आईएमईले सामान्य बढाउँदा नविलले राख्यो यथावत

३२ साउन, काठमाडौं । वाणिज्य बैंकहरुले भदौ महिनाका लागि फरक फरक ब्याजदर निर्धारण गरेका छन् । बैंकर्स संघले साउनदेखि ब्याजदरको कार्टेलिङ खारेज गरेपछि बैंकहरुले आफैंले ब्याजदर तोकेका हुने भने मुद्दती निक्षेपकाे ब्याजदरमा केही बैंकहरुले ब्याजदर हेरफेर गरेका छन् । भदौ १ गतेबाट लागू हुने निक्षेपको ब्याजदर बैंक अनुसार फरक फरक भएको छ । 

नयाँ प्रकाशित ब्याजदर अनुसार बैंकले अधिकतम १०.८९ प्रतिशतसम्म ब्याजदर दिने भएका छन् । नविल, ग्लोबल आईएमई, एनआईसी एसिया लगायत बैंकले व्यक्तिगत मुद्दती निक्षेपमा केही परिवर्तन गरेका छन् । संस्थागततर्फ अधिकतम ८.८९ प्रतिशतका दरले ब्याज दिने जनाएका छन भने मुद्दतीको ब्याजदर फरकफरक छ । लामो अवधिको मुद्दतीमा १०.८९ तथा ३ महिने र एक वर्षभन्दा कम अवधिकोलाई ७.२९ प्रतिशतसम्म ब्याज दिने बैंकहरुको भनाइ छ । 

नबिल बैंकले ब्याजदर सार्वजनिक गरेको छ । बैंकले भोलि भदौ १ गतेदेखि ब्याजदर सार्वजनिक गरेको हो । बैंकले भदौ महिनामा साउनकै ब्याजदर यथावत राखेको हो । बैंकले भदौमा साधारण बचत खातामा न्यूनतम ५.९० प्रतिशतदेखि अधिकतम ७.९० प्रतिशतसम्म ब्याजदर प्रदान गर्ने भएको छ । बैंकले रेमिटेन्स बचतमा भने ८.९० प्रतिशत ब्याजदर तोकेको छ । यसअघि साउनमा पनि सोही ब्याजदर कायम थियो ।

यस्तै, बैंकले मुद्दती निक्षेपमा संस्थागततर्फ ७.९९ प्रतिशतदेखि ८.४९ प्रतिशत र ब्यक्तिगततर्फ ९.४९ प्रतिशतदेखि १०.४९ प्रतिशतसम्म ब्याजदर तोकेको छ । बैंकले रेमिट्यान्स खातामा भने १०.४९ प्रतिशतदेखि ११.४९प्रतिशतसम्म ब्याजदर तोकेको छ । साउनमा पनि सोही ब्याज कायम थियो ।
  
ग्लोबल आइएमई बैंकले पनि नयाँ ब्याजदर सार्वजनिक गरेको छ । बैंकले भदौ १ गतेदेखि लागू हुने गरी विभिन्न खातामा ब्याजदर बढाएर सार्वजनिक गरेको हो । बैंकले साधारण बचत खातामा न्यूनतम ५.९६६ प्रतिशतदेखि अधिकतम ७.९६६ प्रतिशतसम्म ब्याजदर तोकेको छ । त्यस्तै, रेमिट्यान्स बचतमा ९.९६६ प्रतिशत ब्याजदर तोकेको छ । यसअघि साउनमा बैंकले न्यूनतम ५ प्रतिशतदेखि अधिकतम ७ प्रतिशत ब्याजदर तोकेको थियो ।

ग्लोबलले बैंकले मुद्दती निक्षेपमा संस्थागततर्फ ८.८९६ प्रतिशत र ब्यक्तिगततर्फ १०.८९६ प्रतिशतसम्म ब्याजदर तोकेको छ । रेमिट्यान्स खातामा भने ११.८९६ प्रतिशत ब्याजदर पुर्याएको छ । यसअघि साउनमा संस्थागततर्फ ७.९९ प्रतिशत र ब्यक्तिगततर्फ ९.९९ प्रतिशतसम्म ब्याजदर तोकिएको थियो ।

 
यस्तै एनआईसी एशिया बैंकले पनि भोलि भदौ १ गतेदेखि लागू हुने गरी विभिन्न खातामा ब्याजदर सार्वजनिक गरेको हो । बैंकले सार्वजनिक गरेको ब्याजदर अनुसार साधारण बचत खातामा न्यूनतम ५.९६६ प्रतिशतदेखि अधिकतम ७.९६६ प्रतिशत ब्याजदर प्रदान गर्ने भएको छ । यस्तै, बैंकले मुद्दति निक्षेपमा संस्थागततर्फ ८.८९६ प्रतिशत र व्यक्तितगतर्फ १०.८९६ प्रतिशतसम्म ब्याजदर तोकेको छ । बैंकको आधार दर १०.१८ प्रतिशत रहेको छ । 

राष्ट्रिय वाणिज्य बैंकले निक्षेपमा भदौ महिनाको लागि ब्याजदर बढाएर सार्वजनिक गरेको छ । बैंकले भदौ महिनाका लागि सार्वजनिक गरेको ब्याजदर अनुसार साधारण बचत खातामा न्यूनतम ४.९९ प्रतिशतदेखि अधिकतम ६.६ प्रतिशत ब्याजदर प्रदान गर्ने भएको छ ।

बैंकले मुद्दति निक्षेपमा संस्थागत तर्फ ७.९९ प्रतिशत र व्यक्तिगत तर्फ ९.९९ प्रतिशतसम्म ब्याजदर निर्धारण गरेको छ । यसअघि सोही ब्याजदर ६.९९ र ८.९९ प्रतिशत थियो । बैंकले रेमिट्यान्स बचत खातामा १०.९९ प्रतिशत ब्याजदर तोकेको छ ।  बैंकले कर्जाको ब्याजदरमा भने बेसरेटमा अधिकतम ३.७५ प्रतिशत र न्यूनतम १.५ प्रतिशतसम्म प्रिमियम लिने भएको छ ।

कुमारी, प्रभु, नेपाल एसबिआई, सिद्धार्थ, राष्ट्रिय वाणिज्य, एनआइसी एशिया, लक्ष्मी सनराइज, सानिमा, कृषि विकास, सिटिजन्स, ग्लोबल आइएमई, एभरेष्ट र नेपाल बैंकले मुद्दती र साधारण बचतमध्ये कुनै न कुनै ब्याजदर बढाएका छन्। धेरैले मुद्दती निक्षेपको ब्याजदर नै बढाएका छन् भने केही साधारण बचतको ब्याजदर बढाएका छन्। 

स्ट्याण्डर्ड चार्टर्ड बैंकले ९१ दिनको मुद्दतीमा ७.२९ प्रतिशत ब्याजदर दिने बताएको छ । त्यसैगरी एनएमबी बैंकले ६ महिनाभन्दा कम अवधिको निक्षेपमा ८.१० प्रतिशत दिँदैछ । एनएमबी, प्राइम कमर्सियल, स्ट्याण्डर्ड चार्टड लगायत बैंकले भने साउनको तुलनामा ब्याजदर घटाएका छन् ।

सबैभन्दा कम ब्याजदर भने स्ट्याण्डर्ड चार्टर्ड बैंकको छ । सो बैंकको मुद्दती निक्षेपमा अधिकतम ८.९२ प्रतिशत ब्याजदर छ । संस्थागततर्फ उसले ६.९२ प्रतिशतका दरले ब्याज दिनेछ । नबिल, एसबीआई र हिमालयन बैंकले ब्याजदर स्थिर राखेका छन् ।

विकास बैंकहरुले भने भदौमा पनि कार्टेलिङलाई निरन्तरता दिएका छन् । राष्ट्रिय स्तरका विकास बैंकले ब्याजदर बढाउँदै कार्टेलिङलाई निरन्तरता दिएका हुन् । उनीहरूले व्यक्तिगत निक्षेपको ब्याजदर ११.१५ र संस्थागततर्फको निक्षेपको ब्याजदर ९.१५ प्रतिशत पुर्याएका छन् । राष्ट्रिय स्तरका विकास बैंकमा साउनमा व्यक्तिगत निक्षेपमा १०.१० र संस्थागत निक्षेपमा ८.१० प्रतिशत ब्याजदर थियो ।