बीमा रकमका लागि आफ्नै टिपरमा आगजनी गर्ने मालिकसहित ३ जनाविरूद्ध मुद्दा दर्ताकाे तयारी

३२ साउन, काठमाडौं । बीमाको रकम भुक्तानी लिन आफ्नै टिपरमा आगजनी गरेको आरोपमा प्रहरीले ३ जनालाई पक्राउ गरेको छ । बीमा रकम लिन सुनियोजित रुपमा आफ्नै टिपरमा आगजनी गरेको आरोपमा उनीहरुलाई ललितपुर पक्राउ गरेको हो । 

पक्राउ पर्नेमा २ जना रामेछाप र एक जना सिन्धुलीका छन् । रामेछाप घर भई काठमाडौं महानगरपालिका–३२ कोटेश्वर बस्ने ३४ वर्षीय प्रदिपकुमार खत्री, टीकाथली बस्ने ३३ वर्षीय भिमसेन खत्री र सिन्धुली घर भई हाल टीकाथली बस्ने रंगबहादुर बुढाक्षेत्री रहेको प्रहरीले जनाएको छ । 

१३ महिना अगाडि प्रदीपकुमारले बा ३ ख २८९४ नम्बरको टिपर मासिक किस्ता १३ लाख रुपैयाँ तिर्ने गरी खरिद गरेका थिए । उक्त टिपर उनले आफ्नै भाइ भिमसेन खत्रीलाई चलाउन दिएका थिए । 

त्यसक्रममा गोदावरी नगरपालिका–९ ठेंचोस्थित नख्खुखोला करिडोर सडकखण्डमा बिग्रिएर चार महिनादेखि थन्किइरहेको थियो । मर्मत गर्न धेरै पैसा लाग्ने भएपछि उनीहरूले नयाँ योजना बनाए । र, यही साउन १२ गते राति टिपरमा पेट्रोल छर्केर आगो लगाइदिए । टिपर जलेर काम नलाग्ने अवस्थामा पुग्यो । त्यसपछि चापागाउँ प्रहरीमा पुगेर आगो लगाउने व्यक्तिको खोजी गरिदिन भन्दै प्रदीपकुमार चापागाउँ प्रहरी वृत्त पुगे । 

त्यसपछि बीमा रकमका भुक्तानी पाउन प्रहरीलाई सिफारिस गर्न भने । तर अनुसन्धानका क्रममा घटनामा संलग्नताको सुई प्रदीपकुमारतिरै सोझिन पुग्यो । अन्ततः आगो लगाउने कसुर प्रदीपकु्मार लगायत मिलर गरेको खुल्यो । त्यसपछि उनलाई पक्राउ गरी अनुसन्धान गर्दा प्रहरीको आशंका सही सावित भयो ।

लामो समयदेखि बिग्रिएर सडक छेउमा थन्किएको टिपरमा आगजनी के उद्देश्यबाट गरियो ? भन्ने कोणबाट थालिएको अनुसन्धानका क्रममा टिपर मालिक र चालक नै दोषी भएको पत्ता लागेको हो ।

हाल प्रदीपकुमार लगायत तीनै जनालाई ललितपुर प्रहरीले ललितपुर जिल्ला अदालतबाट म्याद थप गरी हिरासतमा राखेर अनुसन्धान गरिरहेको छ । आपराधिक उपद्रव कसुरमा अनुसन्धान भइरहेकाे प्रहरीले जनाएकाे छ । अनुसन्धान अन्तिम चरणमा पुगेकाे छिट्टै अदालतमा मुद्दा दर्ता हुने जनाइएकाे छ ।