एमालेको अवरोधले संसद खुल्ने छाँट नदेखिएपछि यसबारे छलफल गर्न सर्वदलीय बैठक बोलाउने राष्ट्रपतिको तयारी

३२ साउन, काठमाडौं । राष्ट्रपति रामचन्द्र पौडेलले जारी संसद अवरोध खुलाउनेबारे छलफल गर्न सर्वदलीय बैठक बोलाउने तयारी गरेका छन् । संसद नखुल्ने छाँट नदेखिएपछि राष्ट्रपति पौडेलले सर्वदलीय बैठक बोलाउने तयारी गरेको उनको सचिवालयले जनाएको छ । प्रमुख प्रतिपक्षी दल एमालेका अध्यक्ष केपी ओलीसँग बुधबार मात्र संसद बैठक सुचारु गराउने सन्दर्भमा पौडेलले आफ्नै कार्यालय शीतलनिवासमा बोलाएर छलफल गरेका थिए । 

त्यसपछि पनि एमालेले संसद गतिरोध अन्त्य गर्ने बारे लचिलो हुने संकेत नदेखाएपछि राष्ट्रपति पौडेलले सर्वदलीय बैठक राख्ने भएका हुन् । बैठक कहिले बोलाउने भन्ने बारे उनले राय लिइरहेका छन् । लामो समय संसद गतिरोध हुँदा अन्तर्राष्ट्रिय क्षेत्रमा समेत असर पर्ने भन्दै पौडेलले गम्भीरता साथ चासो दिन थालेका हुन् । 

राष्ट्रपति पौडेलले प्रधानमन्त्री पुष्पकमल दाहाल ‘प्रचण्ड, सभामुख देवराज घिमिरे र राष्ट्रिय सभाका अध्यक्ष गणेश तिमिल्सिना र शेरबहादुर देउवालाई बोलाएर संसद गतिरोध अन्त्यबारे छलफल गरिसकेका छन् । प्रमुख प्रतिपक्षी एमालेले साउन १० गतेदेखि संसदको दुवै सदन अवरुद्ध पार्दै आइरहेको छ ।

यही साउन २ मा त्रिभुवन अन्तर्राष्ट्रिय विमानस्थलबाट सुन तस्करी उच्च स्तरीय छानबिन समिति गठन हुनुपर्ने माग राख्दै संसद बैठक अवरुद्ध पार्ने क्रमलाई निरन्तरता दिइरहेको छ । आउँदो भदौ ३ गतेका लागि संसद बैठक बोलाइएको छ । पौडेलले त्यस पहिल्यै सर्वदलीय बैठक बोलाउने तयारी गरेको शीतलनिवासकाे दाबी छ । अहिले संसदमा रहेका दलहरुमध्ये आठ दल सरकारमा छन् । प्रतिपक्षमा एमाले, रास्वपा र राप्रपा छन् ।