सन्दीपविरुद्धको मुद्दाः पीडितको आमाको जन्ममिति सम्बन्धी कागजात मगाउने आदेश

३२ साउन, काठमाडौं । क्रिकेटर सन्दीप लामिछानेविरुद्ध बलात्कार मुद्दामा काठमाडौं जिल्ला अदालतले पीडित किशोरीको आमाको जन्ममिति सम्बन्धी कागजात मगाउने आदेश दिएको छ । 

बिहीबार न्यायाधीश राजकुमार खतिवडाको इजलासले आमाको नागरिकतासम्बन्धी कागजात मगाउने आदेश दिएका हुन् । मुद्दामा आज अन्तिम सुनुवाइ हुने भनिएको थियो । तर पीडितको आमाको नागरिकता सम्बन्धी कागजपत्र मगाउने आदेश मात्र दिएको छ । 

अदालतले पीडित किशोरीको आमाको जन्ममिति खुल्ने कागजात मगाउने आदेश दिएको लामिछानेका कानुन व्यवसायी सरोजकृष्ण घिमिरेले बताए ।

पीडित भनिएकी किशोरी र उनकी आमाको उमेर अन्तर ९ वर्ष मात्र फरक देखिएको भन्दै सो विषय यकिन गर्न आमाको जन्ममिति खुल्ने कागजातसहित नागरिकताका सबै कागज मगाउने आदेश भएको हो ।

उक्त कागजपत्र प्राप्तपछि मात्र अन्तिम सुनुवाइ हुने घिमिरेको भनाइ छ । आरोपी लामिछानेलाई नेपालको तर्फबाट एसिया कप खेल्ने टिममा क्यानले नाम समावेश गरेको अवस्था छ ।