मुलुकमा व्याप्त विकृति र विसंगतिको अन्त्य गर्न आफू नेतृत्वको सरकार लागिरहेको छः प्रधानमन्त्री प्रचण्ड

३२ साउन, रामेछाप । प्रधानमन्त्री पुष्पकमल दाहाल प्रचण्डले मुलुकमा व्याप्त विकृति र विसंगतिको अन्त्य गर्न आफ्नो नेतृत्वको सरकार लागिरहेको बताएका छन् । सरकार मुलुकमा भ्रष्टाचार अन्त्य गरी सुशासन र विकासका लागि अघि बढिरहेको भन्दै उनले बताएका छन् । 

रामेछापको दोरम्बा शैलुङ गाउँपालिकाको डाडाँकटेरीमा आयोजित २०औं दोरम्बा स्मृति दिवस कार्यक्रमलाई बिहीबार सम्बोधन गर्दै उनले गठबन्धनमा कुनै समस्या नभएको बताए । ‘सुशासन, सामाजिक न्याय र समृद्धिका कुरामा हामी एकताबद्ध छौं,’ उनले भने, ‘प्रतिक्रियावादीहरूले चलाएको बाहिरी हल्लाको पछि नलाग्न म तपाईँहरूलाई आग्रह गर्दछु ।’ 

सरकारमा गएपछि माओवादी र जनताबीचको सम्बन्ध चिसिँदै गएको उनको भनाइ छ । प्रचण्डले सरकारमा गएपछि जनता र पार्टीबीचको सम्बन्ध टाढिएको बताए । ‘हिजो हामी सामन्तवाद निरंकुशविरुद्ध बन्दुक बोकेर लडाइँमा थियौं । त्यसबेला माओवादी र जनताको सम्बन्ध पानी र माछाको सम्बन्ध जस्तै थियो,’ प्रधानमन्त्री दाहालले भने, ‘विगतमा हामीले गरेका त्यस्तो सम्बन्ध केही अल्मलिएकाले फेरि पुरानै बाटोमा ल्याउन नयाँ संकल्पसहित लागेका छौं ।’

प्रधानमन्त्री प्रचण्डले शान्ति सहकार्य र एकता’को सन्देशसहित मुलुकलाई नयाँ युगतिर लैजान आवश्यक रहेको बताए । मुलुकमा स्थायी शान्ति, सुशासन र समृद्धिका लागि धेरै काम गर्न बाँकी रहेको प्रधानमन्त्रीको भनाइ छ । ‘हामी देशमा आमूल परिवर्तन ल्याऔं भनेर सैद्धान्तिक रूपमा भन्न त भन्छौं तर व्यवहारमा जनताको दैनिकीमा परिवर्तन ल्याउन सकिरहेका छैनौं । कहीँ न कहीँ अल्मलिएका छौं,’ प्रधानमन्त्री प्रचण्डले भने ।

‘हिजो हामी रक्तपात पूर्ण क्रान्तिमा थियौँ, तर आज हामी समाजवादका निम्ति रूपान्तरणको शान्तिपूर्ण अभियानमा जुटेका छौं,’ प्रचण्डले भने, ‘फेरि जनतासँग जोडिएर प्रतिगमन र भ्रष्टाचारविरुद्ध एकाकार भएर समाजवादी क्रान्ति सफल बनाउन आवश्यक छ । आउने ३ महिनामा नयाँ एउटा वातावरण बन्छ, बन्छ । अर्को ३ महिनामा हाम्रो पार्टी जीवन्त पार्टीका रूपमा आउँछ । त्यसो भयो भने २०६४ को निर्वाचनको जस्तै परिणाम ल्याउन गाह्रो छैन ।’