आङटावासहित १० जनाको मुद्दामा रिट जारी भएन, सबैका मुद्दा एकसाथ राखेर पेशी ताेक्ने आदेश

३२ साउन, ललितपुर । नक्कली भुटानी शरणार्थी प्रकरणमा पुर्पक्षका लागि कारागारमा रहेका पूर्व सांसद आङटावा शेर्पा, निलम्बित सचिव टेकनारायण पाण्डेसहित १० जना प्रतिवादीहरुको रिट निवेदनमाथि उच्च अदालत पाटनले रिट जारी गर्न अस्वीकार गरेको छ । 

जिल्ला अदालत काठमाडौंको आदेशमा मुद्दा पुर्पक्षका लागि जेलमा रहेका मध्ये शेर्पा, पाण्डेसहित १० गते साउन १२ र १७ मा जिल्ला अदालतको आदेश बदरको माग गर्दै रिहाईका लागि दायर गराएका रिट निवेदनमाथि आज न्यायाधीशद्वय हरिप्रसाद पौडेल र किरणकुमार पोखरेलको इजलासमा भएको सुनुवाइपछि रिट जारी नहुने निर्णय सुनाएको हो । 

अभियुक्त सबैको रिटमा अन्तिम सुनुवाइका लागि जिल्ला अदालत काठमाडौंको फैसला, मुद्दाका मिसिल सम्पूर्ण कागजात पेश गर्न आदेश भएको छ । याे सँगै नक्कली भुटानी शरणार्थी प्रकरणमा जेल परेका सबै जना थुनामै रहने भएका छन् । रिट निवेदन दिएका सबैका मुद्दा एकसाथ राखेर पेसी ताेक्ने आदेश भएकाे छ ।

अभियुक्तहरू पाण्डे, शेर्पा, नरेन्द्र केसी, सानु भण्डारी, डा. इन्द्रजित राई, हरिभक्त मर्हजन, लक्ष्मी मर्हजन, सन्देश शर्मा, शमशेर मियाँ र गोविन्द चौधरीले फरक फरक मितिमा रिट दायर गराएका थिए ।

जिल्ला अदालतको आदेशमा गएको असार १ गतेदेखि उनीहरूलाई हाल केन्द्रीय कारागार सुन्धारा र नख्खु कारागार ललितपुरमा राखिएको छ । नेपालीलाई नक्कली भुटानी बनाएर अमेरिका उडाउने योजनासाथ करिब ८ सय नेपालीसँग जनही ५ लाख रूपैयाँसम्म उठाएर ठगी गरेको आरोपमा प्रहरीकाे प्रतिवेदनले जिल्ला सरकारी वकिलकाे कार्यालय काठमाडाैंले मुद्दा चलाएकाे थियो । मुद्दामा उनीहरुविरुद्ध झण्डै २७ करोड रूपैयाँ बिगो र जरिवाना र कैद सजायको माग गरिएको छ ।

सोही प्रकरणमा नेपाली कांग्रेसका नेता एवं पूर्वगृहमन्त्री बालकृष्ण खाँण, एमालेका नेता एवं पूर्व उपप्रधानमन्त्री टोपबहादुर रायमाझी समेत जेल मुद्दा पूर्पक्षका लागि परेका छन् । प्रकरणमा उजुरी पर्ने क्रम अझै जारी रहेको प्रहरीले जनाएको छ । यही मंगलबार मात्र १० जना पीडितले आफूहरूलाई हाल थुनामा रहेका आरोपीहरुले २ करोड भन्दा बडी ठगी गरेको भनी काठमाडौंमा प्रहरीमा उजुरी दिएका छन् ।

सोही प्रकरणमा एमालेका नेता समेत रहेका पूर्वगृहमन्त्री रामबहादुर थापाका छोरा प्रतीक, थुनामा रहेका राईका छोरा निरज लगायत ११ जना अझै फरार छन् ।