लम्पीस्किन रोगबाट मरेका पशुको क्षतिपूर्ति दिन नसकिने कृषिमन्त्रीकाे प्रष्टोक्ति

३२ साउन, काठमाडौं । कृषि मन्त्री वेदुराम भुसालले सरकारले लम्पीस्किन रोगबाट मरेका पशुहरुको क्षतिपूर्ति दिन नसक्ने बताएका छन् । 

बिहीवार प्रतिनिधि सभा अन्तर्गतको कृषि, सहकारी तथा प्राकृतिक स्रोत समितिमा सांसदहरुले सोधेको प्रश्नको जवाफ दिँदै मन्त्री भुसालले यस्तो बताएका हुन् । उनले पीडित किसानलाई राहतसम्म दिन सकिने बताए । त्यसनिम्ति कार्यविधि बनाउने काम भइरहेको जानकारी दिए । बैठकमा क्षतिपूर्ति दिन संभव नै नरहेको उनको प्रष्टोक्ति थियो ।

बैठकमा उनले लम्पीस्किन रोग संक्रमणबाट मुलुकमा अहिलेसम्म १३ लाख पाँच हजार ३६१ पशुु संक्रमित भएको र हालसम्म राँगा, भैंसी, गाई र गोरु समेत गरी ४७ हजार ६४९ पशु मरेको जानकारी दिए । एक लाख ७५ हजार ५५३ पशु अहिले पनि संक्रमित अवस्थामा रहेको बताए । 

उनले रोगविरुद्ध लगाउने खोप तान्जानिया, टर्की र जोर्डनबाट आयात भइरहेको जानकारी दिए । अहिलेसम्म १३ लाख ६९ हजार डोज भ्याक्सिन आएको र ६ लाख ८६ हजार चार सय ५० पशुलाई भ्याक्सिन लगाइसकिएको बताए । 

लम्पी स्किनका कारण सयौं किसानका गोठ नै खाली भएको अवस्था छ । गोरु बिरामी पर्ने र मर्ने घटनाकै कारण पहाडी जिल्लामा धेरै किसानले खेत खनेरै धान रोपाइँ गरेका थिए ।

पीडित किसानहरुले भने चौपायामा ठूलो क्षति हुँदा समेत सरकारले केही नहेरेको भन्दै गुनासो गर्दै आइरहेका छन् । सरकारले बेलैमा औषधि मात्रै दिएको भए आफूहरुल े क्षति व्यहोर्न नपर्ने उनीहरुको भनाइ छ ।