मुख्यमन्त्री थापाले आइतबार विश्वासको मत लिने

१ भदौ, विराटनगर । कोशी प्रदेशका मुख्यमन्त्री उद्धव थापाले यही भदौ ३ गते आइतबार विश्वासको मत लिने भएका छन् । मुख्यमन्त्री थापाले ३ गतेको प्रदेशसभा बैठकमा मुख्यमन्त्री थापाले विश्वासको मत लिने भएको नेपाली कांग्रेसका प्रमुख सचेतक भुपेन्द्र राईले बताए । 

विश्वासको मत लिन शुक्रबार प्रदेशसभा सचिवालयमा सूचना पनि दर्ता भएको छ । साउन १६ गते नियुक्त भएका मुख्यमन्त्री थापाले भदौ १३ गते भित्र विश्वासको मत लिनुपर्ने संवैधानिक बाध्यता छ ।

९३ सदस्यीय प्रदेशसभामा बहुमतका लागि ४७ मत चाहिन्छ । मुख्यमन्त्री उद्धव थापाको नेतृत्वमा सरकारलाई कांग्रेसका २९, माओवादी केन्द्रका १३, नेकपा एकीकृत समाजवादी पार्र्टीका ४ र जसपाको एक गरी ४७ सांसदको समर्थन छ । प्रमुख प्रतिपक्षी एमालेसँग उपसभामुखसहित ४० र प्रतिपक्षी राप्रपामासँग ६ सांसद छन् ।