गरिबले निशुल्क उपचार नपाइरहेको अवस्थामा मैले सरकारबाट खर्च लिन मिल्दैनः कानुनमन्त्री गुरुङ

१ भदौ, काठमाडौं । नेपाली कांग्रेसका उपसभापति एवं कानुन, न्याय तथा संसदीय मामिला मन्त्री धनराज गुरुङले सरकारबाट उपचार खर्च नलिने बताएका छन् । नेपाल निजामति कर्मचारी युनियनले आयोजना गरेको राष्ट्रिय भेला तथा विधान अधिवेशनमा उपचार खर्चको विषय उठाउँदै गुरुङले आफूले यस्तो खर्च नलिने बताए । 

उनले आफू उपचार सकेर फर्केपछि सरकारी अधिकारीले उपचार खर्च लिन सुझाव दिएपनि सरकारी खर्च नलिने निर्णयमा पुगेको बताए । गुरुङ साउन २५ मा उपचारका लागि त्रिभुवन विश्वविद्यालय शिक्षण अस्पतालको मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा भर्ना भएका थिए । स्वास्थ्यमा समस्या देखिएपछि उनी उपचारका लागि भर्ना भएका थिए । तीन दिनको उपचारपछि गुरुङ डिस्चार्ज भएका थिए ।

उपचारपछि सरकारी कर्मचारीले आफूलाई दिएको सल्लाहबारे गुरुङले भने,‘उपचारमा त ठूलै खर्च भयो होला । तपाई आफैं मन्त्री हुनुहुन्छ । मन्त्रिपरिषदबाट खर्च लिँदा भैहाल्छ नि भन्ने सुझावहरू आए ।’ जबसम्म गरिब भन्दा गरिब नेपालीहरूलाई निःशुल्क उपचार गर्न सक्दैन तबसम्म राज्यकोषबाट एक रूपैयाँ पनि उपचार खर्च नलिने उनले बताए ।  

उनले सरकारको नीति तथा कार्यक्रममा उच्च तहका नेताहरुरू सबैको सम्पत्ति छानबिन गर्नुपर्ने कुरा उल्लेख रहेको भन्दै त्यसको कार्यान्वयन हुने बताए । गुरुङले सरकार मुलुकलाई सुशासन स्थापित गरेर अघि बढाउन प्रतिवद्ध रहेको समेत बताए ।

बजारमा नक्कली भुटानी शरणार्थी प्रकरण, ललिता निवास प्रकरणसँगै अहिले सुन काण्ड आएको भन्दै सरकारले भ्रष्टाचारमा संलग्न जो कोहीलाई कारबाही गर्ने उनको भनाइ छ । उनले भ्रष्टाचारको लिंग, जात, धर्म हुँदैन भन्ने मान्यताका साथ सरकार अगाडि बढ्ने बताए ।