दलका मान्छे आउने जाने क्रम चलिरहन्छ, कर्मचारीले इमान र कर्तव्य छाड्न हुँदैनः देउवा

१ भदौ, काठमाडौं । सरकारका मुख्य घटक नेपाली कांग्रेसका सभापति शेरबहादुर देउवाले देशलाई समृद्धि र विकासतर्फ अघि बढाउन सबैले इमान्दार भएर काम गर्नुपर्ने बताएका छन् ।

शुक्रबार नेपाल निजामती कर्मचारी युनियन राष्ट्रिय भेला तथा विधान अधिवेशनलाई काठमाडौंमा सम्बोधन गर्दै उनले कर्मचारी भनेको स्थायी सरकार भएको बताउँदै राजनीतिक दलका मान्छे आउने जाने क्रम चलिरहने बताए । उनले स्थायी कर्मचारीहरू मिलेर देशलाई समृद्धि र विकासतर्फ अघि बढाउनुपर्ने बताए । उनले सरकारले लिएको सुशासनका नीतिका कारण सबै पार्टीहरू प्रजातान्त्रिक र संविधानअनुसार चल्न थालेको बताए । 

उनले सरकार पनि अस्थायी भएको बताए । सरकार परिवर्तन भइरहे पनि कर्मचारीले इमान र कर्तव्य छाड्न नहुने उनको भनाइ थियो । स्थायी सरकार सशक्त भए मात्र सरकारले काममा परिणाम निकाल्न सक्ने बताए । 

पूर्वप्रधानमन्त्री समेत रहेका देउवाले कर्मचारी युनियनहरू अधिकारका गठन भएपनि जनता र देशको सेवामा चुक्न नहुने बताए । लोकतन्त्रमा कर्मचारीको अधिकार कसैले खोस्न नसक्ने भन्दै नाम जे राखेपनि संविधान र कानुनले सबैलाई एक ठाउँमा राखेको बताए ।

‘हरेक कर्मचारीले मिलेर देशलाई समृद्धितर्फ, विकासतर्फ बढाउनुपर्छ । कोभिडबाट बल्ल बल्ल छुटकरा पाएको छ देशले । अहिले डेंगी आइरहेको छ । सबै कुरालाई ध्यानमा राखेर सरकार, कर्मचारी, राजनीतिक दल अघि बढ्नुपर्छ’ उनले भने । वर्तमान मन्त्रिपरिषदमा रहेका २५ मध्ये कांग्रेसले अर्थसहित ८ मन्त्रालय सम्हालिरहेको छ ।