युरोपियन क्लबमा चम्किइन् सावित्रा, डेब्यू खेलमै गरिन् गोल

१ भदौ, काठमाडौं । युरोपियन क्लब इजरायलको हापोएल रानानामा आवद्ध भएकी नेपाली महिला राष्ट्रिय टिमकी फरवार्ड सावित्रा भण्डारी (साम्बा)ले डेब्यू खेलमै गोल गरेकी छिन् ।

अनेथा कपअन्तर्गत बिहीबार भएको खेलमा उनले हादेराविरुद्ध डेब्यू खेल खेल्दै गोल गरेकी हुन् । साम्बाको १ र अर्का खेलाडी अदी गोल्डेनको १ गोल मद्दतमा रानानाले हदेरालाई २–० ले हरायो ।

साम्बा युरोपियन क्लबका लागि गोल गर्ने पहिलो नेपाली खेलाडी समेत बनेकी छन् । इजरायलको महिला लिग भने अगस्ट ३१ तारिखबाट सुरु हुँदैछ ।