किसानको  खुसीनै कांग्रेसको खुसी होः महामन्त्री शर्मा

१ भदौ, झापा । नेपाली कांग्रेसका महामन्त्री बिश्वप्रकाश शर्माले किसानहरु खुसी भएमात्र नेपाली कांग्रेस पनि खुसि हुनसक्ने बताएका छन् । नेपाल किसान महासंघ कोशी प्रदेश तदर्थ समितिसँगको  भेटघाटका क्रममा शर्माले यस्तो बताएका हुन् । 

कोशी प्रदेशका १४ वटै जिल्लामा जिल्ला तदर्थ समितिका अध्यक्षहरु मनोनयन भैसकेपछि नेपाल किसान महासंघ कोशी तदर्थ समितिले महामन्त्री शर्माको नीजि निवास धुलाबारीमा पुगेर भेट गरेको महासंघका कोशी प्रदेश सचिव यज्ञप्रसाद भट्टराईले बताए ।  

कोशी प्रदेश भित्रका १४ वटै जिल्लामा नेपाली कांग्रेसले आफ्नो भातृसंस्था नेपाल किसान महासंघलाई संगठन निर्माण र किसानका समस्यामा सहयोग पुग्ने आशा लिएको कुरामा महासंघका कोशी प्रदेशका अध्यक्ष राजेन्द्र भट्टराईले महामन्त्री शर्माको ध्यानाकर्षण गराएका थिए ।

नव गठित नेपाल किसान महासंघ कोशी प्रदेश तदर्थ समितिका अध्यक्ष राजेन्द्र भट्टराई, प्रदेश उपाध्यक्ष भगिरथ शर्मा सुवेदी, प्रदेश सचिव यज्ञप्रसाद भट्टराई,  प्रदेश सदस्यहरु जयबहादुर तामाङ्ग, बासु गुरागाई सहित झापा जिल्ला तदर्थ समितिका  अध्यक्ष रत्न थिङ्गलाबो सुब्बा लगायत नेपाल किसान महासंघका पदाधिकारी तथा सदस्यहरुको टोलीले महामन्त्रीलाई भेटी प्रदेशका किसानका समस्या र सरकारका कृषि नीति, कृषि कार्यक्रमका बिषयमा ध्यानाकर्षणसमेत गराएको थियो ।

हिमाल, पहाड, तराई मधेस समेटिएको कोशी प्रदेशमा कृषि तथा पशुपालका क्षेत्रमा निरन्तर सक्रिय किसानहरुलाई किसानका नाममा सरकारद्वारा विनियोजित रकम र कृषि अनुदानमा आम किसानहरूको पहुँचमा वृद्धि गराउन महासंघ सकृय रुपमा लागि पर्ने र यसमा महामन्त्रीको सहयोगको अपेक्षा राखिएको नेपाल किसान महासंघका कोशी प्रदेश अध्यक्ष राजेन्द्र भट्टराईले बताए । 

महामन्त्री शर्माले नेपाल किसान महासंघलाई पालिका देख वडा तहसम्म बिस्तार गरि आम किसानले महशुस गर्ने गरिका कार्यक्रमहरु सञ्चालन गर्न प्रदेश तथा जिल्ला तहका किसान महासंघका पदाधिकारी तथा सदस्यहरुलाई आग्रह गर्दै यसका लागि महासंघका अप्ठ्यारा र असहजतामा आफू सहयोगी हुने प्रतिवद्धता जनाएका थिए । यसका लागि जहिले र जुनसुकै समयमा मलाई सम्पर्क गर्नु भन्दै महामन्त्री शर्माले किसान खुसी भए कांग्रेस खुसी हुने बताएका थिए ।

झापाको धुलाबारीमा आयोजित भेटघाट कार्यक्रममा महामन्त्री  शर्माले नेपाल किसान महासंघका कोशी प्रदेश तदर्थ समितिका पदाधिकारी तथा सदस्यहरु र महासंघ झापा जिल्ला अध्यक्ष रत्न थिङ्गलाबोलाई खादा ओढाएर बधाई सहित सम्मान गर्दै सफल कार्यकालको शुभकामनासमेत दिएका थिए ।