कोशीमा सत्तारूढ दलले लिए बजेट अध्यादेश अस्वीकारको प्रस्ताव फिर्ता

१ भदौ, काठमाडौं । कोशीको प्रदेशसभामा सत्तारूढ दलले दर्ता गरेको बजेट अध्यादेश अस्विकारको प्रस्ताव फिर्ता भएको छ । बजेट अध्यादेश अस्वीकारका लागि कांग्रेसले छुट्टै, माओवादी केन्द्र र एकीकृत समाजवादी पार्टीले संयुक्त रुपमा अस्वीकार प्रस्ताव दर्ता गरेका थिए ।

शुक्रबार बसेको प्रदेृशसभाको बैठकमा सत्तारुढ काङ्ग्रेसका तर्फबाट प्रमुख सचेतक भुपेन्द्र राई र माओवादी केन्द्रका सांसद नारायण बुर्जामगरले प्रदेशको समिकरण  र परिस्थिति बदलिएका कारण जनाउँदै प्रस्ताव फिर्ता लिएका हुन् । जेठ ३२ गते तत्कालीन मुख्यमन्त्री हिक्मतकुमार कार्कीले अध्यादेशमार्फत ल्याएको बजेट असार १४ मा संसदमा टेवल गरेका थिए ।

प्रस्ताव फिर्ता भएसँगै आजको बैठकमा प्रदेशसभा आर्थिक मामिला तथा योजना मन्त्री बाबुराम गौतमले बजेटसम्बन्धी अध्यादेश संसदमा पेश गरेका छन् । प्रदेशसभाको अर्को बैठक भदौ ४ गते बस्ने गरी सृजना दनुवारले बैठक स्थगित गरेकी छन् ।