कांग्रेसले भ्रष्टाचारका फाइल खोल्न खुट्टा कमाउन हुँदैन : महामन्त्री शर्मा

२ भदौ, काठमाडौं । नेपाली कांग्रेसका महामन्त्री विश्वप्रकाश शर्माले कांग्रेसले भ्रष्टाचारका फाइल खोल्न खुट्टा कमाउन नहुने बताएका छन् । कांग्रेस नीति तथा प्रशिक्षण शाखा धनकुटाले शनिबार आयोजना गरेको कार्यक्रममा बोल्दै शर्माले भ्रष्टाचारका फाइल खोल्न कांग्रेस डराउन नहुने बताए । 

भ्रष्टाचार प्रकरणमा सीआईबी हुँदाहुँदै उच्चस्तरीय समिति जरुरी नरहेको बताउँदै महामन्त्री शर्माले अख्तियारसम्बन्धी ऐन कानुन बनाउन नेतृत्व गर्ने कांग्रेसले भ्रष्टाचारका फाइल खोल्न खुट्टा कमाउन नहुने बताएका हुन् । 

‘नक्कली भुटानी शरणार्थी, ललिता निवास प्रकरण, दुई पूर्वप्रधानमन्त्रीलगायतलाई छानबिनको दायरामा ल्याउने सीआईबी हो,’ उनले भने, ‘कांग्रेसको कार्यकर्ता तहमा भ्रष्टाचार निर्मूल अभियानमा पार्टी लागेको छ भन्ने सन्देश जान जरुरी छ ।’

भ्रष्टाचारको फाइल प्रहरीको केन्द्रीय अनुसन्धान ब्युरो 'सीआईबी'ले खोल्नेमा ढुक्क रहन भन्दै उच्चस्तरीय समिति जरुरी नभएको बताएका छन् ।  

अर्को प्रसङमा जनताका आवाज संसद्बाटै बोलिने भएकोले संसद् अवरुद्ध गर्न नहुने महामन्त्री शर्माले बताए । ‘जनताका आवाज टुँडिखेलमा बोल भनेको होइन,’ उनले भने, ‘संसद् अवरुद्ध गरेर आवाज बोलिँदैन ।’