संसद अवरोध खुलाउने विषयमा दुवै पक्षले अडान नछाडेपछि सभामुखले बोलाएको बैठक निष्कर्षविहिन

३ भदौ, काठमाडौं । सभामुख देवराज घिमिरेले बोलाएको बैठक निष्कर्षविहिन भएको छ । संसदको अवरोध खुलाउन घिमिरेले राखेको दलका प्रमुख सचेतक र सचेतकहरूसँगको बैठक विनानिष्कर्ष सकिएको हो । बैठकमा सत्ता र प्रमुख प्रतिपक्ष दुवैले आफ्नो अडान नछाड्दा बैठकमा सहमति नभएको हो । 

बैठकमा सत्तापक्ष र प्रतिपक्षको अडान कायमै राखेका छन् । प्रतिपक्ष एमालेले उच्चस्तरीय छानविन समिति गठन नभएसम्म सहमति हुन नसक्ने जनाएको छ भने सत्ता पक्षले अहिले छानविन समिति आवश्यक नभएको अडान राखेका छन् । 

बैठकमा सत्तापक्षबाट नेपाली कांग्रेस र नेकपा माओवादी केन्द्र तथा विपक्षी दलबाट नेकपा एमाले, राष्ट्रिय स्वतन्त्र पार्टी र राष्ट्रिय प्रजातन्त्र पार्टीका सचेतक र प्रमुख सचेतक सहभागी थिए ।

प्रतिनिधिसभा बैठक आजै दिउँसो १ बजेका लागि आह्वान गरिएको छ । सुन तस्करी प्रकरणमा उच्चस्तरीय छानबिन समितिको माग गर्दै नेकपा एमालेले संसद अवरोध गर्दै आएको छ । सरकार समिति गठनको पक्षमा नहुँदा अझै कुरा मिल्न नसकेपछि प्रधानमन्त्रीले पनि बैठक राखेका छन् ।