कसैका बारे बयान लिने वा नलिने टुंगाे लगाउने काम गन्बन्धनकाे हाेइन : गगन थापा

३ भदौ, काठमाडौं । संघीय सांसद एवं नेपाली कांग्रेसका महामन्त्री गगन थापाले सत्तारुढ गठबन्धनको बैठक बसेर कुनैपनि प्रकरणमा मुछिएका व्यक्तिमाथि बयान लिने वा नलिने भनेर निर्णय गर्न नमिल्ने बताएका छन् ।

आइतबार झापाको शिवसताक्षीमा आयोजित कार्यक्रममा महामन्त्री थापाले गठबन्धनको बैठकले अपराधका घटनामा मुछिएका दलविशेषका नेतालाई बयान लिन हुने वा नहुने भनेर कांग्रेसले निर्णयमा भाग लिन नमिल्ने बताए । उनले गठबन्धनको बैठक प्रत्यक्ष प्रसारण हुनुपर्ने समेत बताए ।  ‘म त भनिरहेको छु, कांग्रेसको बैठक होइन, गठबन्धनको बैठक लाइभ गर्नुपर्दछ । त्यहाँ के कुरा भयो देश र जनताले थाहा पाउनुपर्दछ’ उनले भने । गठबन्धनले कसैको बयानबारे निर्णय लिन नसक्ने उनको भनाइ थियो । आराेप लागेका जाेकाेही व्यक्तिसँग बयान लिने वा नलिने टुंगाे लगाउने काम गन्बन्धनकाे नभएकाे उनकाे भनाइ थियाे ।

बालुवाटारस्थित सरकारी स्वामित्वको १४३ रोपनी जग्गा (ललिता निवास) हिनामिना प्रकरणमा छानबिन जारी राखेर पक्राउ परेकाहरुमाथि अनुसन्धान गरिरहेको बेला प्रहरीले पूर्वप्रधानमन्त्रीद्वय माधवकुमार नेपाल र डा. बाबुराम भट्टराईमाथि तत्कालीन मन्त्रिपरिषदका अध्यक्ष भएकाकाले बयान लिने तयारी गरेपछि सत्तारुढ दलहरुको गठबन्धन बैठकले बयान लिन नमिल्ने निर्णय लिएको थियो ।  नेपाल नेतृत्वको एकीकृत समाजवादी र डा. भट्टराई नेतृत्वको नेपाल समाजवादी पार्टी पनि गठबधनमा आवद्ध छन् ।  कंग्रेस मुख्य घटक रहेको छ भने दोस्रो घटक प्रचण्ड नेतृत्वको माओवादी केन्द्र सरकारको नेतृत्व गरिरहेको छ । 

सांसद थापाले प्रहरीले सुन तस्करी, ललिता निवास र नक्कली भुटानी शरणार्थी प्रकरणमा प्रसंशनीय अनुसन्धान गरिरहेको बेला प्रहरी अधिकारीहरुको सरुवा गरिनु उचित नभएको बताए । प्रकरण र ठूला भ्रष्टाचार काण्डमा सरकारमा रहेका दलको ठूला नेता तानिने भएपछि प्रहरी अधिकारीलाई अन्य पठाइएको आरोप उनको थियो । 

घटनमा दोषी देखिए पार्टीभित्रै मान्छे कारवाहीको दायरामा आउनुपर्छ भन्नेमा कांग्रेस स्पष्ट रहेको उनले बताए । नक्कली भुटानी शरणार्थी प्रकरणमा कांग्रेस नेता बालकृष्ण खाण र पूर्वसांसद आङटावा शेर्पा मुद्दा पुर्पक्षका लागि जेलमा छन् ।

ललिता निवास प्रकरणमा अनुसन्धान गरिरहेको सीआईबीले डा. भट्टराई र नेपालसँग बयान नै नलिई जिल्ला सरकारी वकिलको कार्यालय काठमाडौंमा मिसिल बुझाउने तयारी गरेको छ ।