एमालेले संसदलाई अनिर्णयको बन्दी बनायो : सांसद रामहरी खतिवडा

३ भदौ, काठमाडौं । सुन प्रकरणमा उच्च स्तरीय समिति गठनको अडानमा रहेको नेकपा एमालेका कारण अवरुद्ध संसद बैठक आइतबार पनि बस्दै नबसी स्थगित भएको छ । 

त्रिभुवन विमानस्थल भन्सार कार्यालयबाट बाहिरिएको करिब ६० किलोग्राम सुन २ साउनमा सिनामंगलबाट बरामद भएको थियो । एमालेले उक्त सुन भन्सार पास भएर आउनुमा गृहमन्त्री र अर्थमन्त्री पनि दोषी रहेको दाबी गर्दै उनीहरुमाथि छानबिन गर्न उच्चस्तरीय छानबिन समिति गठनको माग गर्दै १० साउनदेखि संसद बैठक अवरोध गर्दै आएको छ ।

लगातार अवरुद्ध भएको संसद खुलाउन सभामुख देवराज घिमिरेले आइतबार राष्ट्रिय मान्यता प्राप्त दलका प्रमुख सचेतकहरुसँग छलफल समेत गरे । बैठकमा एमालेले सुन तस्करीको छानबिनका लागि उच्चस्तरीय समिति बनाउनुपर्ने अडान दोहोर्याएको छ भने सत्तारुढ दलहरु त्यसमा सहमत भएका छैनन् ।

यसैबीच, नेपाली कांग्रेसका सांसद रामहरी खतिवडाले नेकपा एमालेले संसद अनिर्णयको बन्दी बनाएको आरोप लगाएका छन् । 
आइतबार प्रतिनिधिसभाको बैठक स्थगित भएपछि सञ्चारकर्मीसँग कुराकानी गर्दै सांसद खतिवडाले संसद खुलाएर शुन्य समयसम्म जान आग्रह गर्दा समेत एमालेले नमानेको आरोप लगाएका छन् । 

उनले भने,‘ आज संसद खुलाएर शुन्य समय सम्म जाउँ भन्दा पनि उहाँहरु मान्नुभएन । सँधै अनिर्णयको बन्दी बनाएर जनतामा के भनेर जानुहुन्छ । उहाँहरुलाई पनि जिम्मेवारी दिएको छ ।’ कानूनले विश्वास गरेका संयन्त्रलाई अविश्वास गरेर समस्या समाधान हुन्छ ? एमालेलाई  उनको प्रश्न छ । 

उनले भने, ‘कानूनले विश्वास गरेका संयन्त्रलाई चाँहि अविश्वास गर्ने अनि अरूलाई गाली गरेर समस्या समाधान हुन्छ ? त्यसैले नेकपा एमालेलाई आग्रह गर्न चाहान्छु। तपाईहरु केहि नभनी हामीसँग यहाँ आएर संसद चल्न दिनुस् ।’