४७ भए कोशीमा सरकार बन्छ, उपसभामुख प्रपञ्चमा लाग्नु आवश्यक छैन : राजेन्द्र राई

४ भदौ, काठमाडौं । कोशी प्रदेशसभाका सदस्य एवं नेकपा (एकीकृत समाजवादी)को संसदीय दलका नेता राजेन्द्रकुमार राईले प्रदेश सरकार बन्न ४७ जना सांसदको समर्थन भए पुग्ने बताएका छन् ।

कांग्रेसबाट प्रदेशका मुख्यमन्त्री बनेका उद्वव थापाले सोमबार जारी प्रदेशसभाको बैठकमा पेस गरेका विश्वासको मत लिने सम्बन्धी प्रस्तावमाथि दलीय आधारमा बैठकमा भाग लिँदै नेता राईले यस्तो बताएका हुन् । उनले उनले प्रदेशलाई मध्यवधि जानबाट रोक्न थापालाई विश्वासको मत दिने बताए ।

राईले आफ्नो दल एकीकृत समाजवादीले मुख्यमन्त्री थापालाई विश्वासको मत दिने निर्णय सुनाए । उनले ृउपसभामुख सिर्जना दनुवारको गतिविधिप्रति आपत्ति जनाए । सभामुख पद रिक्त रहेको अवस्थामा उपसभामुख दनुवारले आजको बैठक बोलाएको तर उनी आफैं बैठक छलेर हिँडेको भन्दै आपत्ति जनाए । 

‘प्रदेश सरकार गठन गर्न ४७ माननीयहरुको समर्थन पुग्छ, हामी त्यो अवस्थामा छौं’ उनले भने, ‘तर उपसभामुख किन प्रपञ्चमा लाग्नुभयो, बुझ्न सकिनँ, यो तरिका राम्रो होइन ।’ दनुवार बिरामीको कारण देखाउँदै आज बिहानै प्रदेशबाहिर हिँडेपछि सभाका अध्यक्ष मण्डलका स्माइल मन्सुरीले बैठक संचालन गरिरहेका छन् । दनुवार प्रमुख प्रतिपक्ष एमालेकी हुन् ।