मुलढोका फोडेर सानोथिमि बाल सुधार गृहबाट २२० भन्दा बढी थुनुवा फरार, ८४ जना विभिन्न स्थानबाट नियन्त्रणमा

भक्तपुर, ४ भदौ । भक्तपुरको मध्यपुर थिमि नगरपालिका–२, सानोथिमिस्थित बालसुधार गृहबाट २२० भन्दा बढी बन्दी भागेका छन् । सोमबार सुधार गृहमा भएका बन्दीहरुले प्रहरीमाथि आक्रमण गरी मूलढोका फोडेर बाहिर निस्कन थालेपछि स्थिति नियन्त्रणमा लिन प्रहरीले गोलीसमेत चलाएको छ । सो क्रममा तीन कैदी र केही प्रहरी घाइते भएका छन् । 

गृहबाट भागेका मध्ये ८४ जना काठमाडौंका विभिन्न स्थानबाट नियन्त्रणमा लिइएको छ । विभिन्न कसुरमा दोषी ठहर र पुर्पक्षमा रहेका उनीहरू सुधार गृहमा थिए । आइतबार सुधार गृहमा रहेका एक जनाको मृत्यु भएपछि आफन्तहरू विरोधमा उत्रिएका थिए । प्रदर्शनकै मौका छोपेर सुधार गृहका झ्याल र पर्खाल फुटाएर उनीहरू भागेका थिए । त्यसमध्येका ८४ जनालाई प्रहरीले पुनः नियन्त्रणमा लिएको हो ।
 
भक्तपुरको सानो ठिमीस्थित बालसुधार गृहबाट यति ठूलो संख्यामा थुनुवा फरार भएका हुन् । प्रहरीका अनुसार उक्त स्थानबाट २२० हाराहारीमा थुनुवा फरार भएका छन् । उनीहरू कसरी फरार भए भन्ने यकिन हुन सकेको छैन । उक्त सुधार गृहमा रामेछाप जिल्ला मन्थली नगरपालिका घर भएका १८ वर्षीय कमल बस्नेतको आइतबार बिहान मृत्यु भएको हो ।

सुधार गृहका कर्मचारीले उनलाई स्वास्थ्यमा समस्या देखिएको भन्दै नागरिक सामुदायिक अस्पताल लगे पनि अस्पताल पुग्नुअघि नै उनको मृत्यु भएको परिवारका सदस्यहरूले दाबी गरेका थिए । अदालतको आदेशले बस्नेत २०७७ सालदेखि बाल सुधार गृहमा थिए । घाइते बन्दीमध्ये एकजना गम्भीर घाइते भएको जनाइएको छ । दुई जनाको स्थिति सामान्य भएको जनाइएको छ । घाइतेहरूको नागरिक अस्पतालमा उपचार भइरहेको छ ।

यसै क्रममा भित्रका बन्दीहरु सुधार गृहको कम्पाउन्डको मुलढोका फोडेर बाहिर निस्किने र प्रहरीमाथि नै आक्रमण गर्न थालेपछि स्थिति नियन्त्रणमा लिन प्रहरीले गोली चलाएको हो । बन्दीहरुले सुधार गृह बाहिर निस्केर प्रहरीमाथि आक्रमण गर्दै लखेट्न सुरु गरेका थिए । उनीहरूले प्रहरीलाई एसओएस स्कुलसम्म लखेटेका थिए । अहिले सुधार गृहका सबै पुरुष बन्दी बाहिर निस्केका छन् ।

सुधार गृहमा सशस्त्र प्रहरी बलको टोलीले सुरक्षा दिइरहेका छन् । सुधार गृहमा रहेका महिला बन्दीहरु भने त्यही भित्र रहेका छन् । यसै गरी प्रहरीले फरार बन्दीहरु मध्ये करिब २० जनालाई नियन्त्रणमा लिएर प्रहरी वृत्त थिमिमा राखिएको छ ।