भक्तपुरको बाल सुधारगृहबाट फरार नाबालक कैदीकाे खाेजी तीव्र

४ भदौ, काठमाडौं । भक्तपुरको सानो ठिमीस्थित बालसुधार गृहबाट फरार भएकामध्ये ८६ जना अभियुक्तलाई प्रहरीले काठमाडौंका विभिन्न स्थानबाट पक्राउ गरे पनि अन्य फरार रहेका छन्  ।

आइतबार सुधारगृहमा रहेका रामेछापको मन्थली नगरपालिका घर भएका १८ वर्षीय कमल बस्नेतको आइतबार शंकास्पल मृत्यु भएपछि सोमबार दिउँसो अन्य २०० भन्दा बढी नाबालक कैदीबन्दीहरु फरार भएका थिए । त्यसमध्ये करिब एक सयकाे हाराहरिमा मात्र पक्राउ परेका छन् ।

अन्यको तीव्र रूपमा खोजी भइरहेको प्रहरीले जनाएको छ । घटनाको अनुसन्धान गर्न काठमाडौं रानीपोखरीबाट दुई जना एसएसपीहरु दिनेशराज मैनाली र ओम रानाको नेतृत्वको टोली सुधार गृहमा पुगेको छ । 

नाबालक कैदी बस्नेतको मृत्यु शंकास्पद भएको भन्दै छानबिन गर्न र दोषीलाई कानूनी दायरामा ल्याउन माग गर्दै आफन्तले सोमबार दिउँसो सुधार गृह अगाडि विरोध प्रदर्शन गरेका थिए । सो क्रममा कैदीहरु फरार भएको बताइएको छ । 

बस्नेतको मृत्यु घटनामाथि छानबिन गर्न भक्तपुर जिल्लाका प्रजिअ खगेन्द्र रिजालको नेतृत्वमा ३ सदस्यीय छानबिन समिति गठन भइसकेको छ । काठमाडौंबाट पक्राउ परेकाहरुलाई प्रहरीको नयाँबानेश्वर वृत्त तिनकुनेमा राखिएको छ । 

अन्यका खोजीका लागि काठमाडौं उपत्यकाका नाकामा कडा चेकजाँच जारी रहेको र आवश्यक संख्यामा सादा पोशाक र पोशाकमा प्रहरी परिचालन गरिएको उपत्यका प्रहरी कार्यालयले जनाएको छ ।