सभा अध्यक्षकाे दस्तखत प्रयोग भएको भन्दै एमालेको विरोध

४ भदौ, काठमाडौं । कोशी प्रदेशका मुख्यमन्त्रीले विश्वासको मत लिने क्रममा सभाका अध्यक्षता गरिरहेका सांसदको मत लिएको भन्दै प्रमुख प्रतिपक्ष नेकपा (एमाले)का प्रदेश सांसदहरुले बैठकमा विरोध जनाएका छन् । 

गएको साउन १३ मा मुख्यमन्त्री नियुक्त भएका थापाले संविधानको धारा १६८ को ४ बमोजिम प्रदेशसभा बैठकमा आज विश्वासको मत लिने प्रस्ताव पेस गरेका थिए । ९३ सांसद रहेको प्रदेशसभामा थापाको पक्षमा ४७ र विपक्षमा ३० मात्र परेका थियो । प्रस्ताव पारित अर्थात बहुमतका लागि आवश्यक ४७ मत पुगेको भन्दै सभाका अध्यक्ष गरिरहेका कांग्रेसका सांसद स्माइल मन्सुरीले प्रस्ताव बहुमतले पारित भएको घोषणा गरे । 

त्यसपछि एमालेका सांसदहरु कुर्सीबाट उठेर वेल घेराउ गर्दै नाराबाजी गरे । नाराबाजी र विरोधका बिच मन्सुरीले नतिजा घोषणा गरेका हुन् । एमाले र राप्रपाका सांसदहरुले प्रस्तावको विपक्षमा मत हाले थिए । एमालेसँग ४० र राप्रपासँग ६ गरी ४६ सांसद छन् । आजको बैठकमा दुई दलका गरी ९ सांसद बिदामा बसेका थिए ।

सभामुख पद रिक्त रहेकाे अवस्थामा उसभामुख सृजना दनुवार साेमबार काठमाडाैं हिँडेपछि मन्सुरीले सभाकाे अध्यक्षता गरेका हुन् । एमाले सभाध्यक्षको दस्तखतको दुरुपयोग भएको भन्दै अदालत जाने तयारी गरेको छ ।